Հայաստանի ազգային պատկերասրահ
Մրցույթներ

Սիրելի dasaran.am-ցիներ, սկսվել է ձմեռը և բոլորս արդեն պատրաստվում ենք նոր տարվա տոներին: Հայաստանի ազգային պատկերասրահը նույնպես անակնկալ է առաջարկում: 

Եթե Դուք սիրում եք արվեստը, ծանոթ եք մեր հավաքածուին, հետևում եք մեր գործունեությանը, ապա պատրաստ եղեք պատասխանել մեր հարցերին և դեկտեմբեր-հունվար ամիսների ընթացքում հնարավորություն կստանաք երկու հոգով այցելել ՀԱՊ անվճար: 


Հարց 1. 

1979 թ. ստեղծված  “Սևան. Ձմեռ”  կոչվող այս գեղանկարչական աշխատանքը պատկանում է մի նկարչի վրձնին, ում  գրաֆիկական աշխատանքների  ցուցահանդեսը վերջերս բացվեց Հայաստանի ազգային պատկերասրահում և մինչ այժմ գործում է:

Այս հեղինակի առաջին շրջանի գործերը կրել են Հայրենական պատերազմի մասնակից նկարչի վերհուշ-տպավորությունների կնիքը: 1960-ական թթ. վերջերից նա ավելի հաճախ է անդրադարձել մարդու և ժամանակի, ընդհանրապես հայ ժողովրդի պատմական ճակատագրի թեմային: Ստեղծել է նաև դիմանկարներ:

Ասացեք, խնդրեմ, ՀՍՍՀ ո՞ր ժողովրդական նկարչի մասին է խոսքը: 



Հարց 2.

Սա հայտնի ամերիկացի նկարիչ Ռոքուել Քենթի (1882-1971) Հայաստանի ազգային պատկերասրահին նվիրաբերած գործերից մեկն է, որտեղ պատկերված է Հյուսիսային Գրենլանդիան: Ասացեք խնդրեմ, տարվա ո՞ր եղանակին է տեղի ունենում այս կիրակնորյա զվարճանքը:


Հարց 3. 

Վլադիմիր Այվազյանը 20-րդ դարի հայկական գրաֆիկայի ականավոր վարպետներից է: Նրա ստեղծագործական գործունեության հիմնական ոլորտը փորագրությունն է, ավելի ճիշտ`օֆորտը, որին հայ նկարիչներից քչերն են անդրադարձել: Վ. Այվազյանի "Հայաստանի ճարտարապետական հուշարձաններ" նկարաշարքին է պատկանում այս վանական համալիրի ձմեռային տեսարանը:

Ասացեք, խնդրեմ, ինչպե՞ս է այն կոչվում, եթե կառուցվել է XI-XIII դդ, և եղել է կրոնական ու մշակութային կենտրոն: Այստեղ ապրել և գործել են ժամանակի խոշոր գիտնականներ և քաղաքական գործիչներ Գրիգոր Մագիստրոս Պահլավունին, Վասակ Խաղբակյանը, Խաչատուր Կեչառեցին և ուրիշներ: Այժմ վանքի Սբ. Գրիգոր Լուսավորիչ եկեղեցին ծառայում է որպես Կոտայքի թեմի Առաջնորդանիստ: 


Հարց 4.

Այս աշխատանքի հեղինակի բոլոր ցուցահանդեսները վկայեցին. Եվրոպայում ապրում է զարմանալի մի նկարիչ, որը կտավներում սփռում է և´ խինդ, և´ թախիծ, և´ իրականություն, և´ երազանք:

Նա մտածող և ժամանակակից կյանքի գիտատեխնիկական առաջընթացի հետևանքներին ակտիվորեն արձագանքող արվեստագետ էր:

Պատերազմից հետո` սկսած 50-կաններից`  վարպետի մոտ սկսում է սաղմնավորվել իր ուրույն ոճը. գիծն է դառնում նրա գլխավոր արտահայտչամիջոցը: Գծանկարի կարևոր խնդիրներից մեկը լարվածության, ինչ-որ տագնապի զգացողության շեշտումն է: Իսկ այդ ուրույն լարվածությունը հատուկ է նկարչի թե՛ երևակայական, ժամանակի ոգին բացահայտող կտավներին, թե՛ կոնկրետ բնակավայր պատկերող աշխատանքներին: Առարկայի ձևերը կառուցվում են սուր գծերի և փափուկ գունավոր կամ էլ միագույն բծերի համադրմամբ, սակայն միշտ մնում է պլաստիկական անորոշության մի պահ, որն էլ ստեղծում է առեղծվածը:

Չնայած ուրվագծի դոմինանտությանը` գույնը հեղինակի համար կարևոր արտահայտչամիջոց է: Հորինվածքների մեծ մասը հիմնված է գունային հարթությունների (որոնք արտացոլում են երկինքը, հողը, ծովը) և ցանցահյուս նախշերի հակադրության վրա:

“Ամանոր” կոչվող 1974 թ. այս նկարը` գունավոր վիմագրություն է:  Ասացեք, խնդրեմ, ո՞ր սփյուռքահայ նկրարիչն է դրա հեղինակը, եթե նա ծնվել է Տիգրանակերտից գաղթած ծնողների ընտանիքում` Սիրիայի Հալեպ քաղաքում, 1907 թվականի հունվարի 1-ին:


"Ճարտարապետությունը պատկերում"



·         Այս մրցույթը տեղի կունենա 2013 թ. նոյեմբեր ամսվա ընթացքում և կտևի չորս շաբաթ

·         Հարցերը կտեղադրվեն dasaran.am ՀԱՊ էջում շաբաթվա ընթացքում երկու անգամ

·         Մրցույթի մասնակիցները կարող են թողնել պատասխանները որպես դրված հարցի մեկնաբանություն, իսկ նկարների դեպքում` ուղարկել Հայաստանի ազգային պատկերասրահի էլ. փոստի հասցեով` nga_education@yahoo.com: Նամակի թեմայում խնդրում ենք նշել «dasaran.am» կամ «Մրցույթ» բառերը, իսկ յուրաքանչյուր նամակի վերջում գրել ձեր անունն, ազգանունը, դասարանը և դպրոցը, ինչպես նաև հեռախոսահամար, որով կարող ենք կապվել Ձեզ հետ

·         Յուրաքանչյուր հաջորդ հարցը հայտարարելուց առաջ մենք կտեղադրենք նախորդ հարցին տրված առաջին ճիշտ պատասխանները


·         Մրցույթի արդյունքները կամփոփենք նոյեմբեր ամսվա վերջին շաբաթվա ընթացքում


Ակնկալում ենք ձեր ակտի՜վ մասնակցությունը

Ժամանակն է ամփոփել Հ. Այվազովսկուն նվիրված մրցույթի արդյունքնե՜րը:
Այն ընթացավ երկու փուլով: Առաջին փուլի արդյունքները հաշվարկել ենք ըստ տրված ճիշտ պատասխանների քանակի և արագության (առաջին հնգյակում ընդգրկվելու), իսկ երկրորդ փուլի արդյունքներն`ըստ հեղինակի ուղարկած նկարի տեխնիկայի և թեմայի: 
Մեր մրցույթի հաղթողներն են.

I ՓՈՒԼ.
1. Անի Ավետիսյան
2. Վահե Ավետիսյան
3. Լիանա Դավթյան
4. Վիգեն Մկրտչյան 
5. Գոհար Արզումանյան
6. Վահե Դավթյան
7. Մանյա Խաչատրյան
8. Նաիրա Աբրահամյան
9. Օնիկ Պողոսյան

II ՓՈՒԼ.
1. Անի Ավետիսյան
2. Օնիկ Պողոսյան
3. Վահե Դավթյան
4. Վահե Ավետիսյան 
5. Գոհար Արզումանյան

 


Այսպիսով, երկու փուլերի անցկացման արդյունքում հաղթողներ են հռչակվում. 

1. Անի Ավետիսյանը 
2. Վահե Ավետիսյանը 
3. Լիանա Դավթյանը 
4. Վահե Դավթյանը
5. Գոհար Արզումանյանը
6. Վիգեն Մկրտչյանը 
7. Մանյա Խաչատրյանը
8. Օնիկ Պողոսյանը
9. Նաիրա Աբրահամյանը 


Մրցույթի արդյունքները հաշվարկվել են ըստ բալերի: Առաջին փուլի ընթացքում յուրաքանչյուր հարցին ճիշտ պատասխանելու և առաջին հնգակում ընգրկվելու դեպքում մասնակիցը ստացել է 2 բալ: Երկրորդ փուլի ընթացքում առաջին հնգյակում ընգրկվելու դեպքում մասնակիցներին ավելացվել են հետևյալ բալերը. 5-րդ տեղ` 2 բալ, 4-րդ տեղ` 3 բալ, 3-րդ տեղ` 4 բալ, 2-րդ տեղ` 5 բալ, 1-ին տեղ` 6 բալ:

Ներկայացնում ենք հաղթողների խմբում ներառված մասնակիցները բալերը (ըստ ՀԱՊ-ի - ըստ dasaran.am-ի).


1. Անի Ավետիսյանը 24 - 21
2. Վահե Ավետիսյանը 19 -  18
3. Գոհար Արզումանյանը 12   - 15 

4. Լիանա Դավթյանը 14   -  14
5. Վահե Դավթյանը 14  -  14
6. Վիգեն Մկրտչյանը 12  - 12
7. Մանյա Խաչատրյանը 6 - 6
8. Օնիկ Պողոսյանը 5  - 6
9. Նաիրա Աբրահամյանը 4  - 4


Շնորհակալություն բոլորիդ ակտիվ մասնակցության համար: Հայաստանի ազգային պատկերասրահը շնորհավորում է ձեզ և հրավիրում մեզ մոտ` սեպտեմբերի 20-ին ժամը 15:00-ին մասնակցելու հաղթողներ խմբում ընդգրկված մասնակիցների համար անցկացվող հատուկ ծրագրին: 

Խնդրում ենք անպայաման հաստատել Ձեր մասնակցությունը նամակ գրելով nga_education@yahoo.com հասցեյով կամ զանգահարելով (010) 567472, (095) 221667: 

Եվս մեկ արձակուրդային ամիս` ևս մեկ մրցույթ...


Ներկայացնում ենք նոր մրցույթի կանոնները:

 


  • Այն կտևի ևս չորս շաբաթ, իսկ արդյունքները կամփոփվեն սեպտեմբեր ամսվա սկզբում
  • Այս անգամ կլինեն ավելի սեղմ հարցեր, որոնք կդրվեն մեր էջում մի քանի օրը մեկ (շաբաթական 3 անգամ)
  • Որպեսզի մեկնաբանությունների մեջ չլինի նույն միմյանց կրկնող պատասխանների շարանը, առաջարկում ենք պատասխաններն ուղարկել մեզ էլեկտրոնային փոստի հասցեյով` nga_education@yahoo.com

  • Նամակում նշեք ձեր անունն, ազգունը, դասարանը և դպրոցը, ինչպես նաև հեռախոսահամար, որով կարող ենք կապվել Ձեզ հետ

  • Յուրաքանչյուր հաջորդ հարցը հայտարարելուց առաջ մենք կտեղադրենք նախորդ հարցին տրված առաջին ճիշտ պատասխանները
  • Բացի հարցերի բանավոր պատասխաններից, այս անգամ հնարավորություն կտրվի նաև ստեղծագործող դպրոցականներին մասնակցել մրցույթին, ներկայացնելով առաջադրված թեմայի շուրջ ստեղծված իրենց աշխատանքները

​

Օգոստոսի շոգերին շատերն են հիշում ծովը, իսկ մենք եկեք կանդրադառնանք համաշխարհային համբավ ունեցող ծովանկարիչ Հովհաննես Այվազովսկուն:

 


Ահա և նրա ինքնանկարը.


Հարց 1. Որտեղի՞ց էին սերում Հ. Այվազովսկու նախնիները:


Հարց 2. Հ. Այվզովսկին աշխատել է անընդհատ, կյանքի ընթացքում նա ստեղծել է շուրջ 6000 կտավ: Եվ իր գործունեությունը գնահատվել է համապատասխանաբար: 
Ասացեք, խնդրեմ, ի՞նչ պարգևների ու կոչումների է արժանացել Այվազովսկին:


Հարց 3. Ովքե՞ր են եղել Հ. Այվազովսկու ուսուցիչները: 


Հարց 4. Ո՞վ էր Հովհաննես Այվազովսկու եղբայրը:


Հարց 5. Որտե՞ղ է գտնվում հայտնի "Իններորդ ալիք" կտավը:


Հարց 6. Ո՞ր նկարների համար է Հ. Այվազովսկին արժանացել ոսկե մեդալի:


Հարց 7. Ի՞նչ նկարչական տեխնիկաներով է աշխատել Հ. Այվազովսկին:


Հարց 8. Նշեք Հ. Այվազովսկու բարեգործություններից:


Հարց 9. Որտե՞ղ է թաղված Հ. Այվազովսկին և ի՞նչ արձանագրություն կա նրա շիրմաքարին:


Եթե դուք սիրում եք նկարել և ձեզ հետաքրքրել են Հ. Այվազովսկու գեղանկարները կամ կենսագրությունը, զանազան դրվագները իր կյանքից, ապա պատկերեք ձեր սեփական տպավորությունները դրանցից և ուղարկեք մեզ փոստով կամ պարզապես բերեք Հայաստանի ազգային պատկերասրահ: Հասցեն` ք. Երևան 0010, փ. Արամի 1 (մուտքը Հանրապետության հրապարակից), նամակները կարող եք ուղղել կրթական ծրագրերի պատասխանատու Սոնա Մելիք-Քարամյանին:

Մեր առաջին մրցույթի սիրելի' մասնակիցներ, 
շնորհակալություն բոլորիդ ակտիվության համար: 

Որպես հաղթողներ ընտրվել են ամենաարվեստասեր և ամենաարագ դպրոցականները:

Ներկայացնում ենք նրանց.



Վիգեն Մկրտչյան,

Անի Ավետիսյան,

Լիանա Դավթյան,

Գոհար Գրիգորյան,

Դիանա Ղլիջյան, 

Արաքսյա Սարգսյան,

Նաիրա Աբրահամյան,

Մարիամ Մելքումյան, 

Սիանա Ջալալյան, 

Մարիետա Մանուկլյան,

Քրիստինե Պողոսյան, 

Դիանա Մարտիրոսյան,

Սիլվի Հովհաննիսյան,

Արմինե Մկրտչյան,

Լիդիա Եղիազարյան,

Նարինե Երիցյան:

Շնորհավորո~ւմ ենք բոլորին:
Հուլիսի 31-ին Հայաստանի ազգային պատկերասրահում ձեզ սպասում է անակնկալ:

Խնդրում ենք կապվել մեզ հետ մինչև հուլիսի 29-ը ներառյալ և թողնել ձեր կոնտակտային տվյալները: Դա կարող եք անել զանգահարելով (010) 567472, (095) 221667 հեռախոսահամարներով կամ գրելով nga_education@yahoo.com հասցեյով: 

Հուլիս ամիսը մոտենում է ավարտին և այժմ մեր չորրորդ վերջնական հարցի ժամանակն է: Այս անգամ մենք կգնանք հայերին վերաբերող անցյալը:


Ուշադրությո~ւն.



• Նա Ռուբինյան դինաստիայի վերջին ներկայացուցիչն էր, իսկ իր երեխաներն արդեն` այլ դինաստիային էին պատկանում: Նա աչքի էր ընկել քաղաքական ու հասարակական մեծ գործունեությամբ, երիտասարդ էր ու խելացի, իսկ կառավարման հարցերում իրեն օգնում էր գահակից ամուսինը: Ասացեք, ո՞վ էր նա, եթե.

• իր կողմից Սիս մայրաքաղաքում կառուցած հիվանդանոցը առաջինն էր Միջին Արևելքում և նույնիսկ Եվրոպայում, որտեղ բոլոր հիվանդներն ունեին անվճար բուժվելու հնարավորություն, 


• իր կառավարման շրջանում և իր հովանու տակ էին գործում այնպիսի նշանավոր գիտնականներ և մշակութային գործիչներ, ինչպիսիք էին Մխիթար Հերացին, Թորոս Ռոսլինը, Վարդան Այգեկցին և Սարգիս Պիծակը:
Նա Ռուբինյան դինաստիայի վերջին ներկայացուցիչն էր, իսկ իր երեխաներն արդեն` այլ դինաստիային էին պատկանում: Նա աչքի էր ընկել քաղաքական ու հասարակական մեծ գործունեությամբ, երիտասարդ էր ու խելացի, իսկ կառավարման հարցերում իրեն օգնում էր գահակից ամուսինը: Ասացեք, ո՞վ էր նա, եթե.

• իր կողմից Սիս մայրաքաղաքում կառուցած հիվանդանոցը առաջինն էր Միջին Արևելքում և նույնիսկ Եվրոպայում, որտեղ բոլոր հիվանդներն ունեին անվճար բուժվելու հնարավորություն, 

• իր կառավարման շրջանում և իր հովանու տակ էին գործում այնպիսի նշանավոր գիտնականներ և մշակութային գործիչներ, ինչպիսիք էին Մխիթար Հերացին, Թորոս Ռոսլինը, Վարդան Այգեկցին և Սարգիս Պիծակը:


Հայաստանի ազգային պատկերասրահում  կարող ես գտնել Վարդգես Սուրենյանցի նրան նվիրված 1909թ. ստեղծագործությունը

Ժամանակն է փոխել ուղղությունը: Այս ամսվա հաջորդ հարցը կօգնի տեղափոխվել ոչ միայն տարածության, այլև ժամանակի մեջ: Չէ՞ որ Հայաստանի ազգային պատկերասրահում պահվող աշխատանքները ընդգրկում են թե' տարբեր երկրներին, թե' տարբեր դարաշրջաններին վերաբերող թեմաներ:


Այսպիսով, երրորդ հարցը.



  • —Հին հռոմեացիների մոտ ԱՅԴ բառով  (թարգմանաբար` «շրջան»)  անվանում էին օվալաձև բաց կառույցը, որը համապատասխանում էր ժամանակակից ձիարշավարանին: Իրենց մայրաքաղաքի այդպիսի ամենամեծ կառույցը մ.թ.ա. 7 թ.-ին անվանեցին Հռոմի հրաշքներից մեկը: Այս վայրում անցկացվող ներկայացումները քիչ ընդհանրություններ ունեին ժամանակակիցների հետ: Դա ժողովրդականություն վայելող հանդեսների անցկացման վայր էր, առաջին հերթին` ձիարշավի և կառքերի մրցույթների, իսկ հետագայում նաև այլ, թեև սովորաբար ամֆիթատրոններում անցկացվող` գլադիատորների մարտերի, կենդանիների որսահալածման և այլն:


  • —Սկսած հանդիսատեսի շրջանակում ներկայացումններից այս վայրի ժամանակակից տարբերակը ժառանգել է շրջանաձև խաղասպարեզը / հրապարակը: Այն միշտ նույն չափսի է` 42 ֆուտ (13 մետր)` անկախ նրանից, թե ինչ քանակով հանդիսատեսի համար է կառուցվում դահլիճը: Դա պայմանավորված է նրանով, որ ԱՅՍՏԵՂԻ առաջին արտիստները ձիավարներն էին, իսկ ձիերի ոստյունախաղի և ակրոբատիկայի համար անհրաժեշտ է, որ վազող ձիու մեջքը մարզարանի կենտրոնի հանդեպ միշտ նույն աստիճան անկյան տակ լինի: Դրան հնարավոր է հասնել մարզարանի տրամագծի որոշակիության պայմաններում պահպանելով ձիուն հստակ տրված արագությունը: Այս պայմանը բերեց աշխարհի բոլոր ծայրերում նույն համարների իրականացման հնարավորությանը:


  • —Դրա ժամանակակից տեսակը հայտնվեց միայն XVIII դարի վերջում: 1774 թ.-ին Ֆրանսիայում երկու անգլիացի ձիավար` հայր և որդի Ասթլեյները կառուցեցին շրջանաձև դահլիճ, որն անվանեցին ԱՅԴՊԵՍ, և կազմակերպեցին ձիերով տարբեր վարժություններից և ակրոբատիկ էտյուդներից բաղկացած ներկայացումներ:
Ասացեք, ինչի մասին է խոսքը, եթե Հայաստանի ազգային պատկերասրահի հավաքածուից Մորիս Բրիանշոնի  կտավում, տեսնում ենք այդտեղ ընթացող նախապատրաստությունը:

Անցնենք երկրորդ հարցին: Այս անգամ կանդրադառնանք քաղաքներին և գեղանկարի միջոցով կփորձենք շրջել ամբողջ աշխարհով մեկ, ոչ միայն Հայաստանով:


Ուշադրությո~ւն, հարցը.


  • Մի առասպելի համաձայն այս քաղաքը հիմնել են երկու ձկնորս 1275 թ.-ին` Ամստել գետի ափին: Իսկ 16-րդ դարի ավարտին, 17-ի սկզբին այն հասավ իր “Ոսկե դարին”, դառնալով աշխարհի ամենամեծ նավահանգիստը և առևտրի ամենամեծ կենտրոններից մեկը:
  • Ամբողջ աշխարհում ճանաչում են այն զարմանալի առանձնատները, որ կանգնած են քաղաքի ջրանցքերի երկայնքով: Ֆրոնտոններին քանդակված դեկորը ամենից հաճախ ծեփված է շրջանակի տեսքով` տան տիրոջ զբաղմունքը խորհրդանշող զարդանխշերի համադրությամբ (գործիքներ, հացթուխների, ձկնորսների, դերձակների ֆիգուրներ և այլն):
  • Բայց շատերն այստեղ ապրում են ոչ թե սովորական տներում, այլ նավակներում: Այդպես պակասող բնակարանների խնդիրը սկսեցին լուծել Երկրորդ համաշխարհային պատերազմից հետո, իսկ 60-ականներին այստեղ պատսպարվում էին հիպպիները: Այժմ ջրանցքերի վրա է գտնվում մոտ 2500 փայտից, մետաղից և բետոնից պատրաստված ժամանակակից բնակելի նավեր:


Հայաստանի ազգային պատկերասրահի հավաքածուում ընդգրկված Աննա Օստրոումովա-Լեբեդևայի 1918 թ. կտավում, պատկերված է հենց այդ քաղաքի նավահանգիստը: Անվանե’ք, խնդրեմ, այն:

Հայաստանի ազգային պատկերասրահի կողմից հայտարարված մրցույթը կարող ենք համարել բացվա՜ծ: 



Բոլորս գիտենք, ամառը ճանապարհորդությունների համար ամենահարմար ժամանակն է: Իսկ գիտե՞ք արդյոք, որ դուք կարող եք ճանապարհորդել ամբողջ Հայաստանով՝ դուրս չգալով Երևանի սահմաններից: Անհրաժեշտ է պարզապես այցելել Հայաստանի ազգային պատկերասրահ, որը գտնվում է մայրաքաղաքի կենտրոնում՝ Հանրապետության հրապարակի հարևանությամբ: Այստեղ հավաքված են դասական և ժամանակակից հեղինակների ստեղծագործությունները, որոնցից շատերը նվիրված են Հայաստանի զանազան գեղատեսիլ վայրերին: 

Այսօրվա մեր հարցը հենց դրանցից մեկի մասին է: 


Ուշադրությո՛ւն.



—Համաձայն ավանդության հայոց լեռները ժամանակին հաղթանդամ ու հսկա եղբայրներ են եղել։ Ամեն օր առավոտյան արթնանալով նրանք նախ կապել են իրենց գոտիները և հետո միայն ողջունել իրար։
—Բայց ժամանակն անցնում է, եղբայրները ծերանում են ու սկսում ավելի ուշ վեր կենալ։ Մի օր էլ, արթնանալով, նրանք, հակառակ իրենց սովորության, մոռանում են նախ գոտիները կապել և բարևում են իրար։
—Աստված, տեսնելով այդ, բարկանում է և պատժում եղբայրներին։ Նրանք քարանում են և դառնում լեռներ, գոտիները վերածվում են կանաչ դաշտերի, իսկ քարացած եղբայրների արցունքները`՝ աղբյուրների։
—Նրանցից մեկը ներկայիս Հայաստանի ամենաբարձր լեռն է, իսկ Հայկական լեռնաշխարհում` չորրորդն է ըստ մեծության:

Ասացեք խնդրեմ, ո՞րն է այդ լեռը, եթե այն պատկերել են բազմաթիվ հայ գեղանկարիչներ, իսկ մասնավորապես` Եղիշե Թադևոսյանը Հայաստանի ազգային պատկերասրահում գտնվող 1917 թ.-ի կտավում:


Հիշեցնեմ, որ պատասխաններն ընդունվում են մեկ շաբաթվա ընթացքում, բայց մրցանակը կհասնի ամենաարագ պատասխանողներին, բնականաբար, եթե պատասխանը ճիշտ է :)

Դե, շտապե՛ք


Սիրելի դպրոցականներ, եթե դուք հետաքրքրվում եք արվեստով և ցանկանում եք ավելի լավ ճանաչել թե' հայ, թե' արտասահմանյան հեղինակներին՝ իրենց ստեղծագործություններով հանդերձ, հետևե'ք մեր էջին:

Իսկ առաջիկա արձակուրդային ամիսների ընթացքում կարող եք ավելի հետաքրքիր դարձնել առօրյան, մասնակցելով մեր մրցույթներին:

Հուլիս ամսվա ընթացքում յուրաքանչյուր շաբաթ մենք կտեղադրենք մեկական հարց, իսկ ամսվա վերջին օրերին կամփոփենք մրցույթի արդյունքները:

Մասնակիցներից 15-ը, ով ամենաարագ և ճիշտ պատասխանները կտա հարցերին, հնարավորություն կստանա այցելել Պատկերասրահ և մասնակցել մեր խաղ-էքսկուրսիաներից մեկին:

Առաջին հարցը կդրվի արդեն մեկ շաբաթից...