Աշխարհի ամենաջրառատ գետը

Աշխարհի ամենաջրառատ գետն Ամազոնն է (6370 կմ): Ամազոն (պորտուգալերեն և իսպաներեն Rio Amazonas) գետը գտնվում է Հարավային Ամերիկայում:

Ամազոնն առաջանում է Մարանյոնի և Ուկայալի գետերի միախառնումից։ Գետի Երկարությունը Մարանյոնիի ակունքից 6437 կմ է, Ուկայալիի կամ Ապաչետի ակունքներից 7000 կմ է։ Ունի բազմաթիվ վտակներ, որոնցից 20-ի երկարությունը գերազանցում է 1500 կմ-ը։

Գետի և նրա ավազանի մեծ մասը գտնվում է Բրազիլիայում։ Հիմնականում հոսում է հասարակածին զուգահեռ։ Միջին ծախսը (հոսքը)` 200 000 մ³/վրկ է, առավելագույնը` 300 000 մ³/վրկ, միջին տարեկան ծախսը` 7000 կմ³ (աշխարհի բոլոր գետերի ծախսի 15 %-ը)։ Կոշտ հոսքը տարվա ընթացքում գերազանցում է 1 մլրդ տոննան։

Ամազոնի նավարկելի ցանցի երկարությունն ավելի քան 25 հազար կմ է, գլխավոր նավարկելի հունը` 4300 կմ։ Գետաբերանում գետի լայնությունը կազմում է 200 կմ։ Գլխավոր վտակներն են աջից` Ժուրուա, Պուրուս, Մադեյրա, Տապաժոս, Շինգու, ձախից` Իսա, Ժապուրա, Ռիո-Նեգրո։ Գլխավոր նավահանգիստներն են Բելենը, Սանտարենը, Օբիդուսը, Մանաուսը (Բրազիլիա), Իկիտոսը (Պերու)։