Արարատ

Անվանում

Քաղաքը իր անվանումը ստացել է 1947 թվականին Արարատ լեռից, որը գտնվում է 7 կիլոմետր հեռավորության վրա`   Արարատյան դաշտում:

 

Պատմություն

Քաղաքը հիմնադրվել է 1939 թվականին`   մինչ օրս ունենալով Դևալու, Դավալի Դևալու անվանումները: Ներկայիս անվանումը ստացել է 1947 թ-ին: Սկզբնական շրջանում Արարատը նախատեսված է եղել որպես բնակատեղի կառուցվող ցեմենտի գործարանի աշխատողների համար, սակայն արագ աճի շնորհիվ դասվում է քաղաքատիպ ավանների շարքը, իսկ 1962 թ-ից հանդիսանում է քաղաքային բնակավայր:

 

Բնակչություն

Հիմնադրման պահին 1926 թ-ին բնակավայրն ունեցել է 45, 1939 թ-ին ունեցել է 2329, 1959 թ-ին`   5412, 1976 թ-ին`   ավելի քան 15000 բնակիչ, որոնք տեղափոխվել են հարակից գյուղական բնակավայրերից: Ըստ 2005 թ-ի ազգային վիճակագրական ծառայության տվյալների համայնքի բնակչությունը կազմում է 19533 մարդ, որից 47% տղամարդիկ են, իսկ կանայք`   53%:

 

Տնտեսություն

Տնտեսության տեսակետից քաղաքի մասնագիտացման ճյուղը ծանր արդյունաբերությունն է: Քաղաքի մոտ է գտնվում հանրապետության երկու ցեմենտի գործարաններից մեկը`   Արարատի ցեմենտի գործարանը: Ցեմենտի գործարանին կից կառուցվել է ոսկու կորզման ֆաբրիկան, ընդ որում միակը Հայաստանում: Այստեղ բերվում և վերամշակվում է Սոթքի և Մեղրաձորի ոսկու հանքաքարը: Քաղաքում կան նաև գինու-կոնյակի և պահածոների արդյունաբերության ձեռնարկություններ, որտեղ արտադրվում է գինի, կոնյակի սպիրտ, մրգերի, բանջարեղենի պահածոներ:

Քաղաքն ունի դպրոցներ, գրադարաններ, մանկապարտեզներ, երաժշտական դպրոց, հիվանդանոց, պոլիկլինիկա, կապի հանգույց:

Մոտ 1 տասնյակի հասնող գործարանները, որոնք շրջապատում են քաղաքը, առաջացրել են լուրջ էկոլոգիական խնդիրներ, որոնցից է աղտոտված մթնոլորտային ավազանը: