Արամ Խաչատրյանի անվան միջազգային փառատոնի շրջանակներում հանդես է եկել երաժիշտ Ալեքսեյ Օգրինչուկը

Նա տեղեկացրեց որ արդեն փորձեր ունեցել է Հայաստանի պետական երիտասարդական նվագախմբի հետ, և բարձր գնահատեց երիտասարդ հայ երաժիշտների մասնագիտական վարպետությունը։ «Մենք շատ լուրջ ստեղծագործություն ենք կատարելու, Սերգեյը շատ լավ և բարդ ծրագիր է ընտրել, ինչն ազդակներ է հաղորդում երիտասարդ երաժիշտներին»,- ասաց երաժիշտը։

 

Երաժիշտը տեղեկացրեց, որ ինքը երաժշտական ընտանիքից է, ծնողները դաշնակահարներ են, և որոշել են, որ Ալեքսեյը փոքր հասակից պետք է զբաղվի երաժշտությամբ։ 6 տարեկանից դաշնամուր է նվագում, 9 տարեկանից՝ հոբոյ։ Ընդ որում, հոբոյն ընտրել է հենց ինքը։ «Ես փոքր հասակից այցելում էի տարբեր համերգների, լսում սիմֆոնիկ, օպերային, կամերային երաժշտություն, և միշտ նվագախմբում տարբերում ու ընտրում էի հատկապես հոբոյի ձայնը։ Շատերը խորհուրդ չէին տալիս ինձ զբաղվել հոբոյով։ Հոբոյը գործիքների արքան է, բայց միևնույն ժամանակ այն ֆիզիկապես ամենածանրն է, ինչը պայմանավորված է ձայնարտադրության հետ։ Հոբոյը քմահաճ, բայց միևնույն ժամանակ շատ գեղեցիկ գործիք է»,- ասում է Ալեքսեյ Օգրինչուկը։ Նա նաև նկատեց, որ շատ լավ տեղյակ է Արամ Խաչատրյանի երաժշտությանը, թեև երբևէ չի նվագել։

 

Ալեքսեյ Օգրինչուկն ավարտել է Փարիզի կոնսերվատորիան։ Մի շարք միջազգային մրցույթների դափնեկիր է։ 13 տարեկանում արդեն հասցրել էր ելույթներ ունենալ ողջ Ռուսաստանում, Եվրոպայում և Ճապոնիայում: Նա մի շարք միաջազգային մրցույթների մրցանակակիր է, որոնց թվում է Ջենովայի հեղինակավոր CIEM միջազգային մրցույթը, որին նա մասնակցել է 19 տարեկանում: Նա արժանացել է նաև Եվրոպական «Յուվենտուս» մրցանակին 1999թ-ին, Ֆրանսիայի Victoires de la Musique Classique-ի երկու մրցանակին 2002թ-ին, Ռուսաստանի «Տրիումֆ» մրցանակին 2005թ-ին և հաղթել է Borletti Buitini Trust Award-ը 2007թ-ին: Նա հեղինակավոր Rising Stars-ի և BBC New Generation Artists Programmes-ի մասնակից է եղել:

 

Աղբյուրը` 1in.am