ՀՀ կրթության և գիտության նախարար Արմեն Աշոտյանի շնորհավորանքը` ուսուցիչներին

Սիրելի’ ուսուցիչներ, ձեր ներկա սաներն ու շրջանավարտներն այսօր հնարավորություն են ստանում իրենց երախտիքի ու սրտի խոսքն ուղղել ձեզ, հարգանքի տուրք մատուցել տարիներ շարունակ իրենց կրթած ու դաստիարակած, մայրական ջերմությամբ համակած սիրելի մանկավարժներին:

 

Անգամ նրանք, ովքեր հնարավորություն չունեն անմիջական շփվել և շնորհավորել ձեզ, համոզված եմ, որ մտովի և հոգով այս օրը ձեզ հետ են:

 

Այս տոնն առավել արժեքավոր է և գեղեցիկ, սրտամոտ է և հարազատ, քանի որ այսօր, առանց տարիքային սահմանափակման,  իրենց ուսուցիչներին ջերմ խոսքեր են հղում բոլորը` սահմանին կանգնած զինվորն ու գեներալը, բժիշկն ու գիտնականը, մարզիկն ու արվեստագետը, այգեգործն ու պետական գործիչը:

 

Այսօր մեր պետության հզորացման ու ազգային իղձերի իրականացման գործում մենք կրկին ու կրկին ապավինում ենք ձեզ, սիրելի’ ուսուցիչներ: Ձեր գիտելիքն ու վարպետությունը, ստեղծագործական ունակությունն ու կենսափորձը, ինչպես նաև հոգատարությունն ու ներողամտությունը   խիստ անհրաժեշտ են նոր մարտահրավերներին դիմագրավելու, կրթության ոլորտում իրականացվող բարեփոխումների ընթացքն ու արդյունավետությունն ապահովելու համար:

 

Առանձնակի  շնորհավորում եմ վաստակած հանգստի անցած  մեր ավագ սերնդի մանկավարժներին, ովքեր շարունակում են խորհուրդներով և բազմամյա փորձով իրենց նպաստը բերել մեր ընդհանուր գործին:

 

Ուսուցչի օրվա կապակցությամբ  ջերմորեն շնորհավորում եմ Հայաստանի, Արցախի, Ջավախքի, Սփյուռքի ուսուցիչներին և ցանկանում եմ, որ նրանք այսուհետ ևս բարձր պահեն մանկավարժի վեհ կոչումը, մասնագիտական պարտականությունները կատարեն իրենց բնորոշ առանձնակի նվիրումով, բարեխղճորեն և ամենայն պատասխանատվությամբ:

 

Մաղթում եմ ձեզ տոնական բարձր տրամադրություն, աշխատանքային հաջողություններ, առողջություն, անձնական երջանկություն և ամենայն բարիք»:

 

Աղբյուրը` edu.am