Բացվեց «Կրթություն. գործընթաց, թե վերջնանպատակ» երկօրյա համաժողովը

Միջոցառումը նպատակ ունի  համակողմանի քննարկել դասավանդման բնագավառում իրականացվող փոփոխությունների  և նորագույն տեխնոլոգիաների կիրառմամբ ստեղծվող  մեթոդների դրական և բացասական ազդեցությունները:

 

ՀՀ կրթության և գիտության նախարար Արմեն Աշոտյանը  ընդգծելով, որ կրթական գործընթացում նորարարական տեխնոլոգիաների օգտագործման անհրաժեշտությունը ոչ միայն հնարավորություն է, այլև մարտահրավեր,  որն իր հետ  կարող է  բերել լրացուցիչ դժվարություններ, բացման խոսքում նշել է. «Կրթության բնագավառում նորարարական տեխնոլոգիաների օգտագործման վերաբերյալ կան տարբեր՝ երբեմն նույնիսկ  տրամագծորեն հակառակ  մոտեցումներ: Դասական կրթական միջավայրի և մեթոդների կողմնակիցների  համար կրթության միավորը նախկինի պես շարունակում է մնալ  բացառապես դասագիրքը: Կա նաև  երկրորդ ծայրահեղությունը, մարդիկ, ովքեր մոտ ապագայում կրթություն ստանալու գործընթացը պատկերացնում են բացառապես տեղեկատվական տեխնոլոգիաների միջոցով»:

 

Նրա խոսքով՝ ակնհայտ է, որ կրթության ոլորտում նոր տեխնոլոգիաների ներդրման  ուղղությամբ Հայաստանում վերջին տարիներին առկա է լուրջ զարգացում. արդեն գործում են առցանց  կրթության մի քանի հարթակներ՝ բավական հագեցած բովանդակությամբ: «Մենք կատարել ենք մեծ աշխատանք, սակայն ոլորտը մեզ համար դեռևս  հեռանկարային է: Հայաստանն այս ուղղությամբ դեռ շատ բան ունի անելու և սովորելու»,- խոսքն եզրափակելով նշել է նախարարը և հույս հայտնել, որ  մասնագիտական քննարկումները կնպաստեն, որ ապագայում կկայացվեն կրթության զարգացմանն ուղղված  կարևոր որոշումներ:

 

Համաժողովին մասնակցել են ՀՀ-ում Մեծ Բրիտանիայի դեսպան Ջոնաթան Էյվսը, Բրիտանական խորհրդի տարածաշրջանային տնօրեն Մայքլ Բըրդը, անգլերեն լեզվի մասնագետներ, կրթական հաստատությունների ղեկավարներ, դասախոսներ և ուսուցիչներ:

 

Աղբյուրը` edu.am