ԳԱԱ Երկրաբանական գիտությունների ինստիտուտում մեկնարկել է Երկրի վերաբերյալ միջոցառումների շարք

«Միջոցառումների նպատակն է իրազեկ պահել աշակերտներին և, հատկապես, ավագ դպրոցի դպրոցականներին երկիր մոլորակի զարգացման, պատմության, առաջացման մասին և գիտելիքներ հաղորդել մի մոլորակի մասին, որի վրա ապրում ենք, որի բնակիչներն ենք մենք»,-միջոցառումների շարքի մասին նշեց ՀՀ ԳԱԱ ԵԳԻ-ի Հովհաննես Կարապետյանի անվան երկրաբանական թանգարանի տնօրեն Գայանե Գրիգորյանը:

 

Նրա խոսքով՝ կապ է ստեղծվում աշակերտների և բնության միջև, բնական երևույթների իմացության հետ: Կարևոր է բարձր դասարանի աշակերտների հետ հանդիպում կազմակերպել, քանի որ վաղը նրանց առջև մասնագիտական կողմնորոշման հարց կդրվի. «Մենք աշխույժ թանգարանային կյանքով ենք ապրում, կազմակերպում ենք խաղեր, հանդիպումներ, էքսկուրսիաներ: Թանգարանը ֆորմալ կրթական միջավայր է, ունենք հարուստ ցուցանմուշների բազա, հանրությանը մենք տալիս ենք գիտելիքներ երկրի մոլորակի և օգտակար հանածոների մասին, անմիջական հարցազրույցի մեջ մտնելով լսում ենք այցելուների կարծիքը»,-ասում է Գ. Գրիգորյանը:

 

Աղբյուրը` aravot.am