Միջոցառում` Վարդենիսի թիվ 4 հիմնական դպրոցում

Հայոց օրհներգի հնչյունների ներքո դպրոցի 9-րդ դասարանի աշակերտ Հայկ Զիրոյանը բարձրացրեց եռագույնը: Բացման խոսքով հանդես եկավ դպրոցի տնօրեն Անահիտ Սահակյանը: Նա շնորհավորեց դպրոցի մանկավարժական և աշակերտական կոլեկտիվներին, ծնողներին` շեշտադրելով այն իրողությունը, որ ընթացիկ ուսումնական տարին հոբելյանական է  կոլեկտիվի համար:

 

Այս տարի լրանում է դպրոցի երեսուն ամյակը, որի համար էլ դպրոցում հատուկ էին նախապատրաստվել նոր ուսումնական տարվա գալուստին:

 

Այս տարվանից դպրոցում կգործեն հայոց լեզվի և հայ գրականության, կենսաբանության, աշխարհագրության, շախմատի ուսումնական կաբինետներ` նորացված ու հարստացած նորագույն միջոցներով: Համակարգչային սենյակը համալրվել է էլեկտրոնային գրատախտակով, որը միակն է Վարդենիսի տարածքում:Դպրոցում գործում է նաև ռուսաց լեզվի ինտերակտիվ ուսուցման կաբինետ, որը կենտրոն է համարվում նաև շրջանի մյուս դպրոցների սովորողների համար:

 

 Տնօրենը շնորհակալական խոսքեր ուղղեց դպրոցի նախկին սաներին, ովքեր մեծ նյութական միջոցներ են ներդրել` դպրոցում մի քանի դասասենյակներ վերանորոգելու նպատակով:

 

Խնամքով նախապատրաստված էր օրվան հատուկ գեղարվեստական մասը: Միջոցառման ընթացքում ելույթ ունեցավ դպրոցում գործող պարի խումբը:

 

Վարդենիսի քաղաքապետարանի աշխատակիցը, շնորհավորելով դպրոցի մանկավարժական և աշակերտական կոլեկտիվներին, հայտնեց, որ քաղաքապետ Վոլոդյա Խլոյանը նոր ուսումնական տարվա առիթով առաջին դասարանցիներին նվիրում է նոր հեռուստացույց, նվագարկիչ և պայուսակներ: