Պատանի ստեղծագործողների գրական ակումբ

Արարատի մարզի Ոսկետափի ավագ դպրոցում Տ. Մկրտչյանի նախաձեռնությամբ ստեղծվել է Պատանի ստեղծագործողների գրական ակումբ, որի նպատակն է խրախուսել ընթերցող և ստեղծագործող աշակերտներին, ամեն ամիս կազմակերպել գեղարվեստական գրքերի ընթերցումներ, քննարկումներ, գրական մրցույթներ, միջոցառումներ: Փետրվարը հայտարարված էր թումանյանական ամիս: Մեծն Թումանյանի գրական անեզր, անսահման ստեղծագործական աշխարհը ակումբի անդամների համար դարձավ գիտելիքի գանձարան, անսահմանափակ հնարավորություններ ընձեռեց խաղեր ստեղծելու և ժամանցներ կազմակերպելու համար: Ամենայն հայոց բանաստեղծի կենսագրության և ստեղծագործությունների հիման վրա պատանի ստեղծագործողները կազմեցին խաչբառեր, գլուխկոտրուկներ, բառաշղթաներ, գաղտնագրեր: Ճամփորդեցին Թումանյանի բացած զարմանահրաշ աշխարհով, հաղորդակից եղան գեղջուկի գութանի երգին, նահապետական հետամնացությանը զոհ գնացած նորահարս Մարոյի պատմությանը, Գիքորի <<էստի համեցեքին>>, Անուշի ու Սարոյի ողբերգական սիրուն, հիացան նրա հին օրհնությամբ, լուսավոր և հզոր հայրենիքով, անզուգական քառյակներով: