Տոն` ոգեշնչման…

Ջերմուկի Մ.Գորկու անվան թիվ 1 հիմնական դպրոցի առօրյան հագեցած է ու բովանդակալից: Դաստիարակչական, ուսուցողական և արտադպրոցական աշխատանքները այստեղ նրբորեն շաղախվում են ու վերածվում իմաստուն ակնթարթների ամբողջության: Այսօր պատմության խմբակի սաները իրենց ղեկավար Հ.Գևորգյանի հետ համատեղ բեմում են: Վայրկյանները թռչում են, իսկ մեր սաների աչքերում խիզախություն, խրոխտ կեցվածք, լույս ու ոգեշնչում կա: Նրանք են հայ ժողովրդի անցյալը, ներկան, բարդույթները, ջարդերը, կոտորածները, մորմոքն ու վշտաբեկ օրերից դեպի առաջ գնալու, դեպի լույսն ու արարումը ձգվելու, նորի հրամայականը կարևորելու ընձյուղները, որոնք վերածվում են շիվի ու արդեն բերքառատ ծառ դառնալու կամք են դրսևորում: Հերոսանալու և ոչ ասելու թշնամուն, մեծ ու փոքր, մարտի դաշտում կռվելու պատրաստակամ կեցվածք ձևավորելու դասեր են առնում: Մեր ժողովրդի պատմական անցյալը գրված է ամենատարբեր գույներով: Խմբակի անդամները խանդավառված կեցվածքով հաստատում են, որ լույսի սերմնացանները նաև իրենք են, որ վաղվա օրերը, որքան էլ դժվար լինեն, կգրվեն գունեղ ներկերով: Հայրենասիրություն էր ծորում դպրոցականների արտաբերած յուրաքանչյուր հնչյունից անգամ: Երգերը, մեր ժողովրդի անցյալը դրվատող տողերն ու լուսանկարների շարքը առավել միասնականության մեջ ևս մեկ անգամ հաստատեցին այն, որ մենք ունենք ապագա և քայլելու ենք մի նոր ճանապարհով, որն առավել կանաչ և ծաղկազարդ կլինի: Հանդիսատեսը լինելով այս միջոցառման ներկան, ոգեշնչում ու արթնացում ապրեց`խորհելով այն գեղեցիկի ու արարման մասին, որը դեռ առջևում է: Եվ ծնվեց հավատը այսօրվա օրերի. տաք ու լուսավոր… Եվ կգան այդ օրերը շուտով: Մ.Գրիգորյան