Այս տարի ևս հաջողությամբ իրականացվեցին «Սփյուռք» ամառային դպրոցի ծրագրերը

«Ծրագիրն անցյալ տարի իրականացվեց առաջին անգամ և ընդգրկվեց կառավարության ծրագրում, որպես գերակա ուղղություններից մեկը»,- նշում է Սփյուռքի Նախարարության՝ Համահայկական ծրագրերի վարչության պետ Ատոմ Մխիթարյանը:

 

Բանախոսը նշեց, որ Ծաղկաձորում իրականացվող ծրագիրը ընթանում է 5 տարբեր ուղղություններով` Հայոց լեզվի արագացված ուսուցում համապատասխան ծրագրերով` արևելահայերեն և արևմտահայերեն խմբերով, սփյուռքի ուսուցիչների վերապատրաստման դասընթացներ, «Ազգային երգ և պար» դասընթացի ծրագիր, «Սփյուռքահայ երիտասարդ առաջնորդների ամառային դպրոց» ծրագիր և Սփյուռքի լրագրողների վերապատրաստում: Ծրագրի մեջ ներառված են մոտ 220 հոգի մասնակիցներ.«Մասնակիցներ կան Լիբանանից, Ռումինիայից, Ֆրանսիայից, ԱՊՀ երկրներից և Արևելյան եվրոպայից: Նրանք բոլորը սովորում և ապրում են Ծաղկաձորում: Նրանց մի մասը Հայաստան առաջին անգամ է այցելում: Ծրագիրը մեկնարկել է հուլիսի 8-ին, իսկ կավարտվի օգոստոսի 2-ին: Համեմատած անցյալ տարվա հետ, այս տարի մասնակիցների և գործընկերների քանակն ավելացել է»:

 

Աղբյուրը` aravot.am