«Հայ զինվոր» դաս-սեմինար՝ Ստեփանավանի թիվ 1 հիմնական դպրոցում

Սեպտեմբերի 27-ը դեռ երկար կմնա Ստեփանավանի թիվ 1 հիմն. դպրոցի 9-րդ դասարանի աշակերտների և հավաքված հյուրերի հիշողության մեջ: Դպրոցում 9-րդ դասարանի դասղեկ Հեղինե Բաղդասարյանի կողմից անց կացվեց դաս-սեմինար՝ նվիրված Հայ զինվորին: Այն զինվորին, որ մեզ հաղթանակների բերկրանք ու հպարտություն է պարգևել: Դասի ընթացքում աշակերտները հնարավորություն ստացան խորհելու սեփական պետականության և մշակույթի պահպանման համար հզոր բանակի կարևորության և բանակի ու հասարակության փոխադարձ սատարման նշանակության մասին: Դասը սկսվեց ՀՀ օրհներգի խրոխտ կատարմամբ: Երեխաները դասի ընթացքում հիմնավորեցին բանակի կարևորությունը Հայաստանի Հանրապետության և Արցախի բնականոն կյանքի ռիթմը պահպանելու գործում, վերլուծեցին հասարակություն - բանակ փոխգործակցության կարևորությունը, ազգ- բանակ հայեցակարգի հիմնադրույթները: Դասի ավարտին աշակերտները ներկայացրեցին յուրաքանչյուր քաղաքացու և անձամբ իրենց ներդրումը ՀՀ բանակի, ինչպես նաև պետականության հզորացման գործընթացում: Որպես մեծագույն հարգանքի նշան Հայոց բանակին և Հայ զինվորին 9-րդ դասարանցիները սեպտեմբերի 23-ի համադպրոցական արշավի շրջանակներում բարձրացել են Արջասարի բարձունքը և այն նվիրել Հայ զինվորին, նրա փառահեղ հաղթանակներին: Երեխաները դասն ամփոփեցին «Գետաշեն» երգի հուզիչ կատարմամբ: Դաս- սեմինարին ներկա էին դպրոցի տնօրենությունը, ուսուցիչներ, ծնողներ, ինչպես նաև Ստեփանավանի զինվորական մասի ավագ լեյտենանտ Դավիթ Ավդոյանը: Նրանք իրենց գոհունակությունը հայտնեցին երեխաների պատրաստվածության, նրանց ձգտմանը հայրենիքի նվիրյալ զինվոր դառնալու ցանկության համար: