Բարեկեցության հիմքը գիտելիքն է. ՀՀ Նախագահ

Նախագահ Սերժ Սարգսյանը հյուրընկալել է 2016-2017 ուսումնական տարում բարձր առաջադիմություն ցուցաբերած հանրապետության հանրակրթական ուսումնական հաստատությունների մեդալակիր շրջանավարտներին, ինչպես նաև դպրոցականների միջազգային առարկայական օլիմպիադաներում 2017թ. հաջողությունների հասած մայրաքաղաքի և մարզերի աշակերտներին, «Կենգուրու» միջազգային մաթեմատիկական և հայոց լեզվի «Մեղու» մրցույթների մրցանակակիրներին: Նախագահը ողջույնել է ներկաներին՝ շնորհավորելով բարձր առաջադիմություն ցուցաբերած, ինչպես նաև միջազգային օլիմպիադաներում հաղթած դպրոցականներին և երիտասարդներին: «Բարեկեցության հիմքը գիտելիքն է: Մրցունակության հիմքը գիտելիքն է: Այս առումով Հայաստանի Հանրապետությունը մշտապես պատրաստ է կանգնելու ձեզնից յուրաքանչյուրի կողքին: Ես ցանկանում եմ, որպեսզի դպրոցն ավարտելուց հետո, ոմանք նաև բարձրագույն ուսումնական հաստատությունն ավարտելուց կամ նույնիսկ կես ճանապարհին ընդունվեն լավագույն այլ բուհեր: Ավարտելով մեր կամ այլ երկրների բուհեր՝ կցանկանայի, որ ձեզնից շատերը զբաղվեին գիտությամբ, որովհետև, ինչպես ասացի, գիտության ու ուսման նկատմամբ սերն ու ունակություններն են մեր ժողովրդին հասցրել մինչև 21-րդ դար: Ուրեմն, դուք պետք է արժանի շարունակողները լինեք մեր միջնադարյան և նորագույն ժամանակների լավագույն անհատների, նրանց ջանքերի: Մենք մշտապես պատրաստ ենք ձեզ օժանդակելու, ձեզ սատարելու: Իհարկե, շնորհակալ եմ ձեր ծնողներին, ովքեր կարողացել են մի կողմից լավ առումով այդ վարակը տարածել ձեր մեջ, մյուս կողմից մշտապես փորձել են պայմաններ ստեղծել, որպեսզի դուք կարողանաք և՛ լավ սովորել, և՛ հասնել արդյունքների: Բայց իմացեք՝ գլխավոր հերոսը դուք եք, պատմություն կերտողը դուք եք: Ձեր ծնողներն ու ուսուցիչները ձեզ օժանդակում են սիրով, օժանդակում են մեծավարի, օժանդակում են ավելին իմացողի դիրքերից, բայց եթե ձեր ցանկությունն ու աշխատասիրությունը չլինի, դժվար թե դուք կարողանաք հասնել լուրջ հաջողությունների»,-իր խոսքում նշել է Նախագահը: Նախագահը պատասխանել է հանդիպման մասնակիցներին հետաքրքրող հարցերին, այնուհետև կրթության և գիտության նախարարի hետ միասին ոսկե մեդալներ, գովասանագրեր և խրախուսական նվերներ է հանձնել միջազգային օլիմպիադաների մրցանակակիրներին, շրջանավարտներին ու աշակերտներին: Աղբյուրը՝ Panorama.am