Սերժ Սարգսյանն ընդունել է ոսկե մեդալակիրներ Արթուր Ալեքսանյանին և Մաքսիմ Մանուկյանին

Նախագահ Սերժ Սարգսյանն ընդունել է Փարիզում կայացած հունահռոմեական ոճի ըմբշամարտի աշխարհի առաջնության ոսկե մեդալակիրներ Արթուր Ալեքսանյանին և Մաքսիմ Մանուկյանին: Նախագահը շնորհավորել է մարզիկներին՝ փայլուն արդյունքներով հայրենիք վերադառնալու առթիվ և շնորհակալություն հայտնել իրենց հաղթանակով մեր ամբողջ ժողովրդին ուրախության և հպարտության պահեր պարգևելու, բարձր տրամադրություն հաղորդելու, ինչպես նաև մեր ժողովրդին աշխարհում ավելի ճանաչելի դարձնելու համար: Հանդիպմանը ներկա են եղել նաև հունահռոմեական ոճի ըմբշամարտի Հայաստանի հավաքականի գլխավոր մարզիչ Լևոն Ջուլֆալակյանը, Սպորտի և երիտասարդության հարցերի նախարար Հրաչյա Ռոստոմյանը: Նախագահը կարևորել է նաև այն հանգամանքը, որ հաղթանակած մարզիկներն իրենց օրինակով ուղենիշ են դառնում երեխաների և այլ երիտասարդների համար, ովքեր ոգեշնչվում են, ձգտում նմանվել նրանց, դառնում է՛լ ավելի աշխատասեր ու նպատակասլաց: Հանդիպմանը Նախագահը պատրաստակամություն է հայտնել աջակցություն ցուցաբերելու հանրապետությունում ըմբշամարտի զարգացման համար առավել բարենպաստ պայմանների ստեղծմանը: Աղբյուրը՝ Mamul.am