«Երջանկություն» միջազգային մանկական փառատոնին կմասնակցեն նաև հայ երաժիշտները

Հայաստանից փառատոնին կմասնակցեն Ա. Սպենդիարյանի անվան մասնագիտական երաժշտական դպրոցի աշակերտուհի Մերի Մուսինյանը (քանոն), Աշտարակի Ա. Այվազյանի անվան երաժշտական դպրոցի աշակերտ Ալբերտ Անդրեասյանը (երգեցողություն) և Երևանի Պ. Չայկովսկու անվան մասնագիտական երաժշտական միջնակարգ դպրոցի աշակերտ Գևորգ Ստեփանյանը (դուդուկ)։ Նրանք ելույթ կունենան ՀՀ ժողովրդական արտիստ Ջիվան Գասպարյանի հետ:

«Երջանկություն» միջազգային մանկական երաժշտական փառատոնի նպատակն է ուշադրության կենտրոնում պահել գեղարվեստական կրթության և գեղագիտական դաստիարակության հարցերը, ինչպես նաև նպաստել մշակութային միջազգային համագործակցության ամրապնդմանն ու զարգացմանը: Փառատոնի հեղինակն ու ղեկավարը «Պատանի արտիստ» պրոդյուսերական կենտրոնի տնօրեն Մերինե Մելիքյանն է:

Փառատոնի կարևորագույն իրադարձությունը «Երջանկություն» երաժշտական ներկայացման բեմադրությունն է, որի նորարարական ձևաչափը հնարավորություն կընձեռի մեկ ներկայացման մեջ միավորել կախարդական հեքիաթի ժանրը՝  մոլորակի տարբեր ժողովուրդների երաժշտական ու մշակութային ավանդույթների ցուցադրությունով։

«Երջանկություն» ներկայացման մեջ ընդգրկված են Վրաստանի և Ռուսաստանի ժողովրդական արտիստ Թամարա Գվերդցիտելին (Երգի Թագուհի), «Ժողովրդական արտիստ» մրցույթի հաղթող Ալեքսեյ Գոմանը (Փոքրիկ արքայազն), «Ունիվեր» սերիալի հանրահայտ աստղ Ալեքսեյ Լեմարը (Հեքիաթասաց) և «Երջանկություն» մանկական միջազգային փառատոնի հաղթողները:

Աղբյուրը՝ Mincult.am