Մեկնարկել է Ազգային գրադարանային շաբաթը

Ծրագիրը կրում է «Հայոց բանակ 25» խորագիրը և  մեկնարկել է ապրիլի 17-ին: Ազգային գրադարանային շաբաթին իրենց առանձին ծրագրերով մասնակցում են հանրապետության մարզային, համայնքային, մասնագիտական, ինչպես նաև բուհական գրադարանները:

Ազգային գրադարանային շաբաթի շրջանակում գրադարաններում կանցկացվեն հոբելյանական հուշ-հանդիսություններ, քննարկումներ, հանդիպումներ, մշակութային կարևոր տարեդարձերին նվիրված ցերեկույթներ, մասնագիտական շրջայցեր դեպի հայաստանյան գրադարաններ, գրքերի նվիրատվություններ, այլ միջոցառումներ: Ազգային գրադարանային շաբաթը նպատակաուղղված է նպաստելու գրադարանների, գրքի, ընթերցանության և գիտելիքի կարևորմանը և դրանց նկատմամբ հետաքրքրության խթանմանն ու դրսևորմանը:

Ծրագիրը միաժամանակ նպատակ ունի արժևորելու գրադարանների նշանակությունը հանրության կյանքում, որի ամենամյա կազմակերպումն ակնկալում է գրադարանների միջև արդյունավետ համագործակություն, գրքի և տեղեկատվական ոլորտի աշխատակիցների ակտիվ ներգրավվածություն գրադարանային գործում, գրադարան-հանրություն կապի ամրապնդում և գրադարաններ հաճախելու մշակույթի ձևավորում: Ազգային գրադարանային շաբաթը կամփոփվի ապրիլի 23-ին:

Աղբյուրը՝ Mincult.am