Ամփոփվել է «Սահմանադրություն և իրավունք» դպրոցական 1-ին օլիմպիադան

 

Արարողությանը ԱՀ կրթության, գիտության և սպորտի նախարար Սլավա Ասրյանը, արժևորելով նմանօրինակ օլիմպիադայի անցկացումը,  նշել է. «Դպրոցականները ևս մեկ անգամ հնարավորություն ստացան ցույց տալու իրենց գիտելիքներն Արցախի օրենսդրության իմացության ոլորտում: Հանձնաժողովը, ստուգելով և վերլուծելով,  հաստատել է, որ կան բավականին բարձր մակարդակի աշխատանքներ»:

 

Նախարար Ս. Ասրյանը, շնորհակալություն հայտնելով օլիմպիադան նախաձեռնած «Արցախի երիտասարդ գիտնականների և մասնագետների միավորում» հասարակական կազմակերպությանը, հավաստիացրել է, որ օլիմպիադան,  ինչպես դպրոցական առարկայական մյուս օլիմպիադաները, կդառնա ավանդական:

 

«Արցախի երիտասարդ գիտնականների և մասնագետների միավորման»  հիմնադիր, օլիմպիադայի կազմկոմիտեի նախագահ, իրավաբանական գիտությունների թեկնածու Ավետիք Հարությունյանն էլ իր հերթին շնորհակալություն է հայտնել նախարարին պատրաստակամության և բազմակողմանի աջակցության համար: 

 

Նկատենք՝  օլիմպիադային մասնակցել է 55 աշակերտ (20-ը`  Ստեփանակերտից,  35-ը`  շրջկենտրոններից): Oլիմպիադան նպատակաուղղված է ստուգելու աշակերտների իրավական գիտելիքները, ինչպես նաև սեր առաջացնելու դեպի իրավական առարկաները, մասնավորապես՝ «Հասարակագիտություն» առարկայի շրջանակում ուսումնասիրվող «Իրավագիտություն» բաժինը:

 

Օլիմպիադայի շրջանակում 1-ին,  2-րդ և 3-րդ մրցանակային տեղերն զբաղեցրած աշակերտներն արժանացել են օլիմպիադայի խորհրդանշով մրցանակների և դրամական պարգևների:

 

Աղբյուրը՝ Aegmm.org