ԱՄՆ ՄԶԳ-ն կշարունակի համագործակցել Հայաստանի կրթական ոլորտի հետ

Շեշտելով, որ ԱՄՆ ՄԶԳ-ն Հայաստանի կրթական համակարգի կարևոր գործընկերներից է, նախարարը կարևորել է աշխատաշուկայի զարգացմանը միտված համատեղ կրթական ծրագրերի իրականացումը: Փոխադարձ համագործակցության համատեքստում անդրադարձ է կատարվել ինչպես ընթացքի մեջ գտնվող ծրագրերի, այնպես էլ նոր ծրագրերի մեկնարկին: 

 

ՀՀ ԿԳ նախարար Ա. Աշոտյանը կարևորել է հատկապես համագործակցությունը բարձրագույն կրթության և միջհամալսարանական կապերի ամրապնդման ոլորտում: Որպես այս ոլորտում համագործակցության հաջողված օրինակ՝ նշվել է Հայաստանի ազգային ճարտարագիտական լաբորատորիայի հիմնումը: Անդրադարձ է կատարվել նաև կրկնակի դիպլոմների, որակավորումների փոխճանաչման և ՀՀ բարձրագույն կրթական հաստատությունների միջազգային հավատարմագրման խնդրին: 

 

Նշելով, որ Հայաստանը ներգրավված է Եվրոպական կրթական տարածքում, նախարարը միաժամանակ կարևորել է ամերիկյան կրթական ծրագրերով հավատարմագրումը, որը լրացուցիչ խթան կհանդիսանա Հայաստանի կրթական ծառայությունների որակի բարելավման համար ու կնպաստի համակարգի միջազգայնացմանը: 

 

Նշվել է, որ հեռանկարային ուղղությունները կարող են հստակեցվել մասնագիտական ուսումնասիրության արդյունքում: Հանդիպման ընթացքում քննարկվել են նաև համագործակցության ծրագրերին վերաբերող աշխատանքային տարբեր հարցեր:

 

Աղբյուրը` 1in.am