ՀՀ ԿԳ նախարարն այցելել է Արզականի միջնակարգ դպրոց

 

Դիմելով աշակերտներին՝ նախարարը նշել է. «Գիրքը շատ կարևոր է և այն, իրար նվիրելով, մարդիկ փոխանցում են քաղաքակրթությունների կողմից դարերի ընթացքում ստեղծած կարևոր և արժանի արդյունք», իսկ այնուհետև հավելել է. «Որպես փոքր ժողովուրդ պետք է հասկանանք, որ մեր տեսակը պետք է պահպանվի, և դուք այդ տեսակի շարունակողը պետք է լինեք»:

 

Լևոն Մկրտչյանը, անդրադառնալով նաև այն հարցին, թե ինչու է ընտրվել հենց այդ դպրոցը, ասել է. «Մենք հաճախ գնում ենք հայտնի դպրոցներ, սակայն կրթական համակարգի ամուր հենքը հենց գյուղական դպրոցներն են, որտեղ պահպանվել են լավագույն ավանդույթները:

 

Սակայն պետք է ցավով արձանագրել, որ այսօր գյուղական դպրոցների զգալի մասում աշակերտների պակաս կա: Անհրաժեշտ է մշտական ուշադրություն դարձնել այս տիպի դպրոցներին»:

 

Լևոն Մկրտչյանը շրջել է դպրոցում, զրուցել ուսուցիչների և աշակերտների հետ, ծանոթացել դպրոցի նյութատեխնիկական բազային և պայմաններին: Նախարարը դպրոցին նվիրել է համակարգչային լսարան և գրքերի խմբաքանակ:

 

Աղբյուրը՝ Edu.am