Ավետիք Իսահակյանին նվիրված գրական-գեղարվեստական ցերեկույթ

2016 թվականի հոկտեմբերի 26-ին Զովաբերի միջնակարգ դպրոցում կայացավ <<Ավետիք Իսահակյան>> խորագրով ցերեկույթը, որը համեմված էր Իսահակյանի լավագույն պատառիկներով ու հեղինակի ստեղծագործությունների հիման վրա գրված երգերի կատարմամբ: Ցերեկույթին մասնակցում էին 7-11-րդ դասարանների աշակերտները: Դահլիճը զարդարված էր համապատասխան պաստառներով, նկարներով: Դահլիճի մի փոքրիկ անկյուն հիշեցնում էր Շիրակ աշխարհը՝ մեծագույն բանաստեղծի բնակավայրը: Ներկայացվեցին Իսահակյանի կենսագրությունը, ապրած կյանքի տարեգրությունը, հուշերը: Հանդիսատեսը հուզմունք ապրեց, երբ աշակերտները ասմունքեցին <<Աբու Լալա Մահարի>> պոեմից հատվածներ: Յուրահատուկ էր <<Գիշերն եկավ, զով հովն ընկավ>> երգի ներքո բեմադրված պարը: Հնչեցին նաև նրա սիրո թեմայով գրված բանաստեղծությունները: Մոտավորապես մեկ ժամ տևած միջոցառումը հանդիսատեսին և մասնակից աշակերտներին բուռն ոգևորություն պարգևեց: Հանդիսատեսը համոզվեց, որ պետք է է՛լ ավելի հայրենասեր լինել, սիրել կյանքը, համոզվեց, որ առանց սիրո կյանքը դատարկ է, սերը կյանքների կյանք է…