ՀՀ անկախության 25-րդ տարեդարձ

2016թ. հոկտեմբերի 19-ին Գյումրու թիվ 5 հիմնական դպրոցը միջոցառում կազմակերպեց ՀՀ ՊՆ 55035 շեֆ-զորամասում՝ նվիրված Հայաստանի Հանրապետության անկախության հռչակման 25-րդ տարեդարձին: Միջոցառմանը ներգրավվել էին դպրոցի 6-9-րդ դասարանների աշակերտները: Միջոցառումն սկսվեց ՀՀ պետական օրհներգի կատարմամբ, որից հետո այն համեմվեց ուրախ երգով, պարով, ասմունքով, երաժշտական համարներով, հայ ժողովրդի պատմությունը ներկայացնող տեսաֆիլմերով և տարաբնույթ բեմականացումներով: Միջոցառմանը, բացի մանկավարժական հանրույթից, հրավիրվել էին նաև զորամասի հրամանատարա-սպայական կազմը, ժամկետային զինծառայողներ, ներկայացուցիչներ Շիրակի մարզպետարանից, Գյումրու քաղաքապետարանից, կրթության վարչությունից, Գյումրու զինկոմիսարիատից, երկրապահ-կամավորականներ, ազատամարտիկներ, դպրոցների տնօրեններ ու զինղեկներ, աշակերտների ծնողներ: Միջոցառման առանձնահատուկ մասն էին կազմում նաև ՀՀ ԶՈՒ հրթիռահրետանային զորքերի կազմավորման 24-րդ տարեդարձի խորհուրդը, ինչպես նաև 2016թ. ապրիլի 2-5-ը տեղի ունեցած քառօրյա պատերազմը, որի ընթացքում հայրենիքի համար մղված մարտերում քաջաբար ընկան գյումրեցի 7 հերոսներ: Միջոցառմանը հրավիրվածների թվում էին նաև հերոսների ծնողներն ու հարազատները: Միջոցառման ավարտին շնորհավորանքի խոսքով հանդես եկան զորամասի հրամանատարը, դպրոցի զինղեկը, կազմակերպիչ մանկավարժները և փոխտնօրենները, որից հետո իր բարեմաղթանքի ու շնորհակալության խոսքով այն եզրափակեց դպրոցի տնօրեն Մարինե Թահմազյանը: Միջոցառումն ամբողջությամբ նկարահանվեց, առանձին դրվագներ լուսանկարվեցին, որոնք շուտով տեղ կգտնեն դպրոցի ռազմահայրենասիրական վահանակում և աշակերտների մեջ էլ ավելի կամրապնդեն ուսման բարձր առաջադիմության գաղափարն ու հայրենիքին նվիրվածության անկոտրում ոգին: