Ամենամյա նախագիծն այս տարի համախմբեց 75 թեքեյանցու

Ծրագիրը, որն արդեն յոթերորդ տարին է իրականացվում, բազմաբնույթ միջոցառումների շնորհիվ նպաստում է մեր երկրի տարբեր անկյուններում բնակվող երեխաների մտերմացմանը, նրանց մտավոր, ֆիզիկական, անհատական զարգացմանը:

 

Այս տարի ևս ծրագրին մասնակցեցին գերազանց առաջադիմություն ունեցող և սոցիալապես անապահով աշակերտներ Հայաստանի ու Արցախի Վ. Թեքեյանի անվան հինգ դպրոցներից, այսպես՝ ճամբարը մեծ ջերմությամբ համախմբեց Երևանից, Գյումրիից, Ստեփանավանից, Կարբիից ու Բերձորից ժամանած թվով 75 թեքեյանցու:

 

Թեքեյանցի մանկավարժների և ճամբարի ջոկատավարների համատեղ աշխատանքի շնորհիվ երեխաների առօրյան հագեցած էր ինտելեկտուալ, մարզական, մշակութային միջոցառումներով:

 

Մեծ խանդավառությամբ երեխաները մասնակցեցին գիտակների մրցույթին, դաստիարակչական տարբեր թեմաներով զրույց-բանավեճերին, սպորտային խաղերին, գիշերային ու ցերեկային արշավներին, սովորեցին ժողովրդական երգեր ու պարեր:

 

Հանգստի վերջին օրը նույնպես ակտիվ էր: Թեքեյանական դպրոցները հրաժեշտ տվեցին ճամբարին միասնական երգ ու պարով, ասմունքով ու կատակներով: Երեկոյան վառվեց հրաժեշտի ավանդական խարույկը:

 

Նյութը՝ «Թեքեյան Կենտրոն» հիմնադրամի