Քննարկվել են ազգային փոքրամասնությունների կրթական խնդիրները

Համայնքի ներկայացուցիչները նախարարին ներկայացրել են եզդիական համայնքի մտահոգություններն ու առաջարկություններն ազգային փոքրամասնություններ ունեցող ՀՀ դպրոցներում եզդիերենի ուսուցման և մայրենի լեզվի դասագրքերի հրատարակման   վերաբերյալ: Նախարարը խոստացել է բարձրացված բոլոր հարցերը քննարկել ու տալ համաձայնեցված լուծումներ:

 

«Մենք Հայաստանում ապրող  եզդիներին չենք  դիտարկում սոսկ ազգային փոքրամասնության  ներկայացուցիչներ, մենք եզդի ժողովրդի հետ քայլել  ենք  պատմության նույն ճանապարհով, և այդ երթը շարունակվում է»,- իր խոսքում նշել է ԿԳ նախարարը՝ հավելելով, որ Հայաստանի բոլոր ազգային փոքրամասնությունների երեխաներն իրավունք ունեն դպրոցում  մայրենի լեզու սովորել:

 

Հանդիպման ընթացքում նշվել է, որ ՀՀ ԿԳՆ կրթության ազգային ինստիտուտում կազմակերպվել է ազգային փոքրամասնությունների, մասնավորապես՝ եզդիերենի ուսուցիչների վերապատրաստում: Ընդառաջելով  Հայաստանի եզդիների միության առաջարկությանը՝ Լևոն Մկրտչյանը խոստացել է  համայնքի ներկայացուցչին ընդգրկել  ՀՀ ԿԳ նախարարին կից հանրային խորհրդի կազմում:

 

Պայմանավորվածություն է ձեռք բերվել առաջիկայում հանդիպում կազմակերպել նախարարի,  նախարարության   մասնագետների և եզդի  ուսուցիչների հետ՝  քննարկելու  կրթության բովանդակային  խնդիրները:

 

Աղբյուրը՝ Edu.am

Նկարը՝ Panorama.am