Մեկնարկել է Երեխաների սնուցման համաշխարհային համաժողովը

ՀՀ կրթության և գիտության նախարար Լևոն Մկրտչյանը, ներկայացնելով համաժողովի նպատակները և նշանակությունը,  նշել է, որ Երեխաների սնուցման համաշխարհային  համաժողովը  ասիական տարածաշրջանում կազմակերպվում է առաջին անգամ:

 

Համաժողովը  կարևոր է ինչպես փորձի փոխանակման, այնպես էլ ճանաչողության առումով՝ հաշվի առնելով, որ համաժողովում շատ են հատկապես աֆրիկյան երկրների պատվիրակությունները:

 

Նախարարը նշել է, որ դպրոցական սննդի ծրագիրը Հայաստանում գործող ամենահաջողված  սոցիալական ուղղվածությամբ կրթական ծրագրերից  է. «Այսօր ծրագիրն իրագործվում է բոլոր մարզերում ինչպես կառավարության, այնպես էլ միջազգային դոնորների ֆինանսավորմամբ:

 

Մեր նպատակն է  ի վերջո հասնել  նրան, որ Հայաստանի Հանրապետության բոլոր դպրոցների կրտսեր դասարաններում մատուցվի տաք սնունդ... Այս տարվանից սկսած Տավուշի մարզում  ևս դպրոցական սնունդը կմատուցվի պետության միջոցներով:

 

Հետագայում փորձելու ենք քայլ առ քայլ աշխարհագրությունն ընդլայնելով՝ ավելացնել պետության մասնակցությունը ծրագրին»,-նշել է նախարարը:

 

Համաժողովի մասնակիցներին  ողջունել և արդյունավետ աշխատանք են մաղթել Երեխաների սնուցման համաշխարհային հիմնադրամի նախագահ Ջեն Ուայթը,  ՄԱԿ-ի ՊՀԾ գործադիր տնօրեն Էրթահին Քուզին և այլք: Համաժողովի աշխատանքները շարունակվելու են մինչև  սեպտեմբերի 9-ը:

 

Աղբյուրը՝ Edu.am