Գիտելիքի օրը Վանաձորի թիվ 4 հիմնական դպրոցում

Ահա և մեկնարկեց 2016-2017 ուսումնական տարին: Այս տարի Վանաձորի Ա. Ս. Պուշկինի անվան № 4 հիմնական դպրոցը 1005 աշակերտ ունեցող իր համերաշխ ընտանիք ընդունեց 146 առաջին դասարանցիների, որոնք սրտատրոփ և մեծ սպասումներով ոտք դրեցին հարուստ ավանդույթներ ունեցող այս կրթօջախ: Դպրոցի տնօրեն Համլետ Խումարյանը շնորհավորեց դպրոցի մանկավարժներին, ողջ անձնակազմին, ծնողներին և իր սիրելի սաներին նոր ուսումնական տարվա և Գիտելիքի օրվա կապակցությամբ: «Շնորհավորում եմ բոլորիս, առաջին հերթին նորելուկներին: Վստահ եղեք՝ դուք այստեղ հյուսում եք ձեր երկրորդ բույնը հոգատար ու գիտակ մանկավարժների օգնությամբ: Եղե´ք աշխատասեր, կարգապահ ու խոհեմ: Նոր ուսումնական տարին հագեցած է լինելու կրթական և դաստիարակչական բազմաբնույթ միջոցառումներով, ստեղծագործական նախաձեռնություններով, որոնք իրագործվելու են դպրոցի մանկավարժական կոլեկտիվի, ողջ անձնակազմի, ծնողական խորհրդի բարեխիղճ և համագործակցված աշխատանքի շնորհիվ: Մեր ընտանիքը երբեք չի երկնչել և չի երկնչելու դժվարություններից, այլ վստահ առաջ է շարժվելու՝ նվաճելով նոր բարձունքներ, ամենուր բարձր պահելով հայրենիքի պատիվը, դաստիարակելով հայրենանվեր զավակներ: Թող պայքարը լավ արդյունքների համար երբեք չդադարի, բայց թող դադարեն կրակները, որտեղ էլ լինեն, թող խաղաղ, անամպ ու արևոտ լինի երկինքը բոլորիս գլխավերևում: Շնորհավոր նոր ուսումնական տարին:»