Մենք հաղթող սերունդ ենք

Այս խորագիրն էր կրում Սևանի թիվ 4 հիմնական դպրոցում՝ տոնականորեն ձևավորված դահլիճում, անցկացված համադպրոցական միջոցառումը` նվիրված մայիսյան եռատոնին (կազմակերպիչ` Մարիամ Հակոբյան): Միջոցառման սկզբում ներկաները 1 րոպե լռությամբ հարգեցին Հայրենական պատերազմում, Արցախյան հերոսամարտի և ապրիլյան քառօրյա պատերազմի ժամանակ զոհված զինվորների և անմեղ քաղաքացիների հիշատակը: Աշակերտները ծաղիկներ դրեցին խորհրդանշական խաչքարին: Այնուհետև 1- 9-րդ դասարանների աշակերտները հանդես եկան եռատոնին նվիրված բանաստեղծություններով, կատարեցին հայրենասիրական երգեր ու պարային համարներ: Սահիկահանդեսներ ցուցադրվեցին` ներկայացնելով ապրիլյան ագրեսիայի ժամանակ հերոսացած մեր զինվորներին: Բոլորը համակվել էին հայրենասիրական շնչով` երդվելով երբեք չմոռանալ նրանց, ովքեր պահում են հայրենի հողը, իսկ ոսոխը երբեք չի տեսնի ավետյաց երկիրը, քանի որ այն անառիկ է ու պաշտպանված: Միջոցառման ավարտին դպրոցի տնօրեն Սվետլանա Մաթևոսյանը բարձր գնահատելով միջոցառման կազմակերպման գործում դպրոցի կազմակերպիչ Մարիամ Հակոբյանի ջանքերը, միաժամանակ հորդորեց աշակերտներին` լինել հայրենասեր և դառնալ արժանի հետնորդները այսօրվա հայրենիքի պաշտպանների: