Ամփոփվեց «Ստեղծագործական մտածողություն և նորարարություն» մրցույթը

Բացման խոսքով հանդես եկավ համալսարանի ռեկտոր Ս. Օհանյանը: Նա խոսեց փափուկ հմտությունների կարևորության մասին, որոնք դեռևս տեղ չեն գտել կրթական ծրագրերում և ուշադրություն դարձրեց աշակերտների ստեղծագործական և նորարական մտածելակերպի զարգացման վրա, որի նպատակով էլ անցկացվում են այսպիսի լրացուցիչ կրթական ծրագրերը:

 

Այնուհետև աշակերտները բաժանվեցին հինգ խմբի՝ կատարելով տրված առաջադրանքները: Առաջին երկու առաջադրանքը տրամաբանական խաղեր էին, իսկ երրորդ հանձնարարությունը թիմային աշխատանք էր պահանջում: Այսպես, երեխաները պետք է ստեղծեին բովանդակային առումով նոր աթոռ, որը լիներ մրցունակ և ունենար կիրառական նշանակություն:

 

Մրցույթին մասնակցեցին Երևանի թիվ 147, 125, 136, 77, 78, 138, 67, 135, 196 և 174 հիմնական դպրոցների աշակերտները: Միջոցառմանը ներկա էին նաև դպրոցների տնօրեններ, ուսուցիչներ և վարչական աշխատողներ: Մրցույթի արդյունքներն ամփոփվեցին, և հաղթող ճանաչվեց Երևանի թիվ 147 հիմնական դպրոցի թիմը: 

 

Երկրորդ տեղն զբաղեցրեց թիվ 174 դպրոցի թիմը, երրորդ տեղը՝ թիվ 196 դպրոցի թիմը: Մրցանակային տեղեր զբաղեցրած դպրոցներն ստացան պատվոգրեր, իսկ մրցույթի բոլոր մասնակիցներին, ինչպես նաև բոլոր դպրոցներին, տրվեցին մասնակցության վկայականներ:

 

Մրցութային հանձնաժողովի անդամները բարձր գնահատեցին երեխաների ստեղծագործական մտքի թռիչքը, պատրաստվածությունը, սեփական գաղափարները համառորեն պաշտպանելու կարողությունը, որը բնորոշ է փոքրիկ գիտնականներին:

 

Նյութը՝ Եվրասիա միջազգային համալսարանի