Ռազմավարական նշանակություն ունեցող մասնագիտությունները՝ առաջնահերթություն

Հիմնական զեկուցմամբ հանդես է եկել նախնական և միջին մասնագիտական կրթության վարչության պետ Աշոտ Արշակյանը: Նա ՄԿՈՒԶԱԽ-ի անդամներին ներկայացրել է գործատուներից ստացված առաջարկությունները չափորոշիչների մշակման վերաբերյալ: 

 

Համաձայն Մասնագիտական կրթության և ուսուցման զարգացման ազգային կենտրոնի հետ կնքած պայմանագրի՝ նախատեսվում է մշակել 12 մասնագիտության չափորոշիչներ, սակայն խորհրդի քննարկմանը ներկայացվել էր 15 չափորոշչի առաջարկ: 

 

Հիմք ընդունելով այն իրողությունը, որ որոշ մասնագիտություններ ՄԿՈՒ հաստատություններում այս պահին ուսուցանվում են առանց հաստատված չափորոշիչների՝ ՀՀ ԿԳ նախարարն առաջարկել է առաջնահերթությունը տալ պետության համար ռազմավարական նշանակություն, ինչպես նաև քոլեջներում և ուսումնարաններում այս պահին ուսուցանվող և աշխատաշուկայում պահանջարկ ունեցող մասնագիտություններին:

 

«Մենք պետք է չափորոշիչների հաստատումից հետո նաև հասկանանք, թե որքանով են դրանք կրթական գործընթացում և իրական կյանքում քննություն բռնում: Եթե մինչ այժմ ավելի քան 150 ՄԿՈՒ չափորոշիչներ են մշակվել, ապա արդեն եկել է մի փուլ, որպեսզի կատարվի արված աշխատանքի վերլուծություն՝ հիմնված պահանջարկի և պետական առաջնահերթությունների վրա: 

 

Սա ընդունենք որպես սկզբունք և հետագա աշխատանքները շարունակենք այս սկզբունքից ելնելով»,-նշել է Լ. Մկրտչյանը: Որպես մտահոգություն նշվել է նաև, որ մի շարք կարևոր պետական նշանակության մասնագիտությունների համար չափորոշիչներ մշակված չեն:

 

Աղբյուրը՝ Edu.am