Հայոց ուժը

2015թ հոկտեմբերի 14-ին, դպրոցը հյուրընկալել էր մեր սփյուռքահայ հայրենակցին ` Հակոբ Անդրեասյանին, ով հայոց լեզվի և գրականության ուսուցչուհի Գ.Խաչատրյանի հրավերով մեծ ուրախությամբ այցելել էր մեր դպրոց ` ներկայացնելու Երուսաղեմի հայկական համայնքը, պատմելու մեր սփյուռքի ձեռքբերումների ու դժվարությունների մասին: Հանդիպմանը ներկա X և XI դասարանների աշակերտները, նրանց դասղեկներն ու հրավիրված ուսուցիչները հաստատապես կհիշեն այս օրը, այն տպավորությունները, որ ստացան պարոն Հակոբի հետ շփվելուց: Պարոն Հակոբն ապրում է Երուսաղեմում, հայկական թաղամասում և հայապահպան լուրջ գործունեություն է ծավալում: Նա հանդիսանում է Հայ երիտասարդաց միության (ՀԵՄ) առաջնորդ, հրապարակում է ՀԵՄ ամսագիրը, որը տարածվում է բոլոր գաղթօջախներում: Նրա անմիջական մասնակցությամբ ու գլխավորությամբ են անցնում բոլոր պաշտոնական և ոչ պաշտոնական հանդիպումները թե մեր, և թե այլ երկրներից ժամանած պատվիրակությունների հետ: Պարոն Հակոբը հետաքրքիր դասախոսություն կարդաց Երուսաղեմի հայկական համայնքի մասին. պատմական ակնարկի տեսքով ներկայացրեց Երուսաղեմում հայերի բնակություն հաստատելը, հայապահպանման դժվարին գործով զբաղվելը: Անթաքույց հպարտությամբ ու ոգևորությամբ խոսեց հայկական սրբատեղիների (Սբ Հակոբ եկեղեցիների), հայկական երկու դպրոցների, հայկական թաղամասի պահպանման մասին: Անչափ կարևորեց հունական և կաթոլիկ աշխարհներում հայերի դերակատարումը: Խոսեց հայկական համայնքի հաջողությունների ու ձեռքբերումների, նաև տարաձայնությունների ու դժվարությունների մասին, միաժամանակ հավաստիացնելով մեզ, որ մենք ` հայերս, դրսում մեծ կշիռ ունենք ու, մեր ձայնը, հաստատապես, ավելի բարձր է հնչում: Պարոն Հակոբի ոգեկոչող ու տպավորիչ ելույթը ապացույցն էր այն բանի, որ մենք ունենք անկոտրում կամք, դժվարությունները հաղթահարելու մեծ ուժ: Հանդիպումը հետաքրքիր էր և մեզ` աշակերտներիս համար շատ ուսանելի: Շնորհակալ ենք պարոն Հակոբին, իր ուսերին վերցրած հայապահպան ծանր ու դժվարին, բայց հայրենասիրական գործի համար: Շնորհակալ ենք նրան մեզ այցելելու, մեր հետ սփյուռքահայության հաջողություններով ու դժվարություններով կիսվելու համար: Շնորհակալ ենք նաև մեր տնօրենին, պարոն Նիկողոսյանին, ով նախանձախնդրորեն խրախուսում ու աջակցում է նմանատիպ ցանկացած ձեռնարկի: