Երևանի քաղաքապետարանը և «Dasaran»-ն ամփոփեցին «Մաքուր պահենք մեր քաղաքը» մրցույթի արդյունքները

Միջոցառմանը որպես պատվավոր հյուրեր ներկա էին Երևանի փոխքաղաքապետ Արամ Սուքիասյանը, Երևանի քաղաքապետարանի հանրակրթության վարչության պետ Գայանե Սողոմոնյանը, «Dasaran» կրթական ծրագրի հիմնադիր նախագահ Սուրեն Ալոյանը, կրթական ոլորտի պատասխանատու այրեր և այլք:

 

Ընթացիկ տարվա հուլիսի 1-ից մեկնարկած մրցույթը նպատակաուղղված էր հանրության, մասնավորապես՝ նրա թիրախային խմբի՝ դպրոցահասակ երեխաների մեջ սերմանելու և արմատավորելու օրինապահ քաղաքացի լինելու գիտակցությունը, ձևավորելու հետևողական վերաբերմունք ոչ միայն քաղաքամայր Երևանի, այլև սեփական համայնքի և շրջակա միջավայրի նկատմամբ:

 

Միևնույն ժամանակ մրցույթի կարևորագույն առաքելությունն աշակերտներին համապատասխան հարթակ տրամադրելն ու հնարավորություն ընձեռելն էր իրենց իսկ հեղինակած աշխատանքի միջոցով ևս մեկ անգամ հաստատելու այն գաղափարը և տարածելու այն համոզմունքը, որ բնությունը հասարակության արտացոլանքն է, ավելին՝ բնությունը բումերանգի նման հետ է վերադարձնում մեզ մեր վերաբերմունքը:

  

Ազդարարման առաջին իսկ օրվանից մեծ հետաքրքրություն առաջացրած մրցույթին մասնակցելու և իրենց պատրաստած անհատական կամ խմբակային տեսանյութերը ներկայացնելու հնարավորություն են ունեցել «Dasaran» կրթական ծրագրի կայքում գրանցված Հայաստանի և Արցախի հանրակրթական բոլոր դպրոցների 437.706 աշակերտները:

 

«Մաքուր պահենք մեր քաղաքը» վիդեոմրցույթի շրջանակում հաղթող է ճանաչվել ընդհանուր առմամբ 25 աշակերտ (5-ն ընտրվել է հանձնաժողովի կողմից, 20-ը՝ քվեարկությամբ), որոնք պարգևատրվեցին խրախուսական նվերներով և պատվոգրերով:

 

Ըստ որում՝ հանձնաժողովի ընտրած աշակերտներից մեկը՝ Երևանի թիվ 78 հիմնական դպրոցի աշակերտուհի Դիանա Պողոսբեկյանը, հենց մրցանակաբաշխության օրն արժանացավ սահմանված գլխավոր մրցանակին՝ նոթբուքին, իսկ նրա դպրոցը պարգևատրվեց համակարգչով և պատվոգրով: