Կմեկնարկի «Թումանյանական հեքիաթի օր» փառատոնը

Այս տարի փառատոնը նվիրվում է ՅՈՒՆԵՍԿՕ-ի հիմնադրման 70-ամյակին և դիտարկվում որպես «Տիկնիկները հանուն խաղաղության և միջմշակութային երկխոսության» համաշխարհային երթի և տիկնիկային թատրոնների միջազգային փառատոնի շարունակություն:

 

Քանի որ այս տարի Հայոց ցեղասպանության 100-րդ տարելիցն է, ուստի «Թումանյանական հեքիաթի օր» տիկնիկային թատրոնների միջազգային 10-րդ փառատոնի շրջանակում նախատեսվում է Եղեռնի զոհերի հիշատակին նվիրված միջոցառումների շարք:

 

Փառատոնին կմասնակցեն տիկնիկային թատրոններ Վրաստանից, Լիտվայից, Ռուսաստանի Դաշնությունից, Իտալիայից, Ուկրաինայից, Թուրքմենստանից և Բուլղարիայից, ինչպես նաև թատերախմբեր Արցախից, Հայաստանի տարբեր մարզերից: Փառատոնի ներկայացումները կդիտեն հազարավոր երեխաներ և մեծահասակներ:

 

Ամեն օր կգործի «Երեկոյան ակումբը», որտեղ կքննարկվեն ներկայացումները, մտքեր կփոխանակվեն, հանրահայտ տիկնիկային գործիչների կողմից կանցկացվեն վարպետության դասեր:

 

Կկազմակերպվի սեմինար՝ «Տիկնիկները հանուն խաղաղության», «Երջանիկ մանկություն՝ երջանիկ ապագա», «Տիկնիկային գործիչների դերը պատերազմների և ահաբեկչական գործողությունների արդյունքում առաջացած սթրեսային ապրումների հաղթահարման գործում» և «Վերականգնողական գործունեությունը մանկատներում և հատուկ հաստատություններում» թեմատիկ քննարկումներով:

 

Աղբյուրը՝ Mincult.am