Գնացին, խաղացին, հաղթեցին

Տարբեր էին ժամանակները, աշակերտները, անգամ դարը, սակայն կրկնվեց պատմությունը, և նորից փայլուն հաղթանակ: Թիվ 1 դպրոցի ուրախներն ու հնարամիտները դպրոց բերեցին ոչ միայն լավագույն խաղի համար նախատեսված արձանիկ-մրցանակը, այլ նաև հնարավորություն ստացան 2015թ.-ի հունվարին Ծաղկաձորում մասնակցելու դպրոցական լիգայի առաջնության գավաթին:

 

 «Նոր սերունդ» թիմի ղեկավար Հայկանուշ Գրիգորյանը փորձել էր յուրաքանչյուր առաջադրանքին հաղորդել սցենարային ինքնատիպ լուծումներ: Սևանցի դպրոցականները, որոնք ներկայացնում էին 4-րդ, 7-րդ և 8-րդ դասարանները, իրենց ճարպկությամբ, արագ կողմնորոշվելու կարողությամբ, ստեղծագործական մոտեցումների շնորհիվ կարողացան հաղթահարել նաև այս փորձությունը և տուն բերել լիգայի առաջնության գավաթը:

 

Թիվ 1 հիմնական դպրոցում անհամբերությամբ էին սպասում «Նոր սերնդին» և նրանց դիմավորեցին հերոսների պես, դպրոցի տնօրենը թիմի ղեկավարին և մասնակիցներին հանձնեց շնորհակալագրեր, իսկ մրցանակակիրներն էլ իրենց գավաթով համալրեցին դպրոցի հաղթանակների վավերագիր մրցանակների շարքը: Դպրոցում ոգևորությունն ու խանդավառությունը շարունակվեց նաև օրերս:

 

Դպրոցի մանկավարժական և աշակերտական կոլեկտիվների հյուրերի համար ծաղկաձորյան խաղը կրկնվեց դպրոցի դահլիճում, որը համեմված էր ուսումնական գծով փոխտնօրեն Լիանա Ներսիսյանի` դպրոցի ՈՒՀԱ-ին նվիրված անցումներով, մի քանի ամիսների ընթացքում կատարված աշխատանքների ներկայացմամբ: «Նոր սերունդ»-ը փայլուն ձևով կատարեց իր առջև դրված առաջադրանքը՝ գնաց, խաղաց, հաղթեց:

 

Իսկ առջևում նոր մրցաշարեր են, որոնց թիմը մասնակցելու է` հավատարիմ իր կարգախոսին` «ԿՎՆ-ն ոչ միայն խաղ է, այլ նաև կյանք»: Լ. Ներսիսյանի փոխանցմամբ հունիս ամսին դպրոցի թիմը հյուրի կարգավիճակով կմասնակցի Լիգայի եզրափակիչ խաղին, իսկ Հանքավանում` ամառային գավաթին արդեն լիիրավ անդամի կարգավիճակով: