«Dasaran» կրթական ծրագիրը և ՀՀ 56 թանգարանները

Փոխհամագործակցության շրջանակում Հայաստանի ազգային պատկերասրահը մշակութային-ճանաչողական տեղեկատվություն է տրամադրում «Dasaran»-ի կայքի միջոցով, ինչպես նաև յուրաքանչյուր ամիս հյուրընկալում Հայաստանի հանրակրթական դպրոցների ավելի քան 100 աշակերտի, ուսուցիչների և ծնողների, որոնք մասնակցում են պատկերասրահում անցկացվող ինտերակտիվ շրջայցերի:

 

Աշակերտներին մշակութային կյանքին, արվեստին, արվեստագետների կերտած գլուխգործոցներին հաղորդակից դարձնող և մշակույթ-դպրոց կապն ամրապնդող «Dasaran»-յան նախաձեռնություններն այս տարի թևակոխել են զարգացման նոր փուլ:

 

Այսպես, «Dasaran» կրթական ծրագրի և Թանգարանների միջազգային խորհրդի (ICOM) հայաստանյան ներկայացուցիչները համատեղ կազմակերպել էին հանդիպում հայաստանյան 56 թանգարանների ներկայացուցիչների հետ՝ քննարկելու մշակութային հնարավոր համագործակցությանն առնչվող մի շարք հարցեր: 

 

Հանդիպման ընթացքում ծավալվեց հետաքրքիր քննարկում աշակերտների շրջանում Հայաստանում գործող թանգարանների գործունեության վերաբերյալ իրազեկվածության բարձրացման և թանգարան այցելելու մշակույթի ձևավորման շուրջ, կատարվեցին նաև արդյունավետ դիտարկումներ, հնչեցին կարևոր առաջարկներ: