Արտասովոր ռեստորաններ

Մալդիվյան կղզիների Hilton հյուրանոցի ռեստորանում հաճախորդները մշտապես գտնվում են շնաձկների և այլ ծովային բնակիչների ընկերակցությամբ: Աշխարհի առաջին ապակեպատ ռեստորանը գտնվում է Հնդկական օվկիանոսում՝ 5 մետր խորության վրա:

 

Բնության սիրահարները, հավանաբար, կգնահատեն Նոր Զելանդիայում տեղակայված ռեստորանը հենց ծառի վրա՝ մոտ 10 մետր բարձրությամբ: Այն հիշեցնում է ծառի բնի շուրջ փաթաթված բոժոժ և իսկապես ամենագեղեցիկ ձևավորված ռեստորաններից մեկն է:

 

Իսկ ահա Կանադայի O.NOIR ռեստորանների ցանցը յուրահատուկ փորձություն է առաջարկում հաճախորդներին, որոնք ճաշակում են ուտեստները կատարյալ մթության մեջ: Հետաքրքրական է նաև այն, որ ռեստորանի մատուցողները կույր են և շատ արագ կողմնորոշվում են մթության մեջ:

 

Ճապոնիայի Kayabukiya պանդոկում կարելի է տեսնել կապիկ մատուցողների: Նրանք բավական լավ են վարժված և կարող են ապահովել համապատասխան սպասարկում: Որպես թեյավճար նրանց կարելի է թողնել սոյայի լոբիներ կամ ծխախոտ:

Հաճախորդներին գրավելու յուրահատուկ մեթոդ է կիրառվում նաև Ճապոնիայի մեկ այլ՝ Nyotaimori ռեստորանում, որտեղ ավանդական սուշին մատուցվում է մերկ կնոջ մարմնի վրա:

 

Եվս մեկ անսովոր ռեստորան կարելի է այցելել Իտալիայի Պիզա քաղաքում: Ռեստորանը գտնվում է բանտի ներսում, որտեղ խոհարարները և մատուցողները բանտարկյալներ են: Զինված բանտապահների հսկողությամբ հաճախորդները կարող են վայելել բանտարկյալների ձեռքով պատրաստած ճաշատեսակները:

 

Modern Toilet ռեստորանների ցանցը շատ հայտնի է ողջ Թայվանում:  Անվանումից թերևս կարելի է գուշակել, որ ռեստորանում գրեթե ամեն ինչ՝ սպասքը, սեղանները, աթոռները, լոգարանի պարագաների տեսքով է: Հյուրերը նստում են, կներեք, իհարկե, զուգարանների տեսք ունեցող աթոռների վրա և ուտում են լվացարանակոնքերի և լոգարանների ձև ունեցող ամաններից: