Բազկիդ զորություն, հա´յ զինվոր

Educational 2015-02-05

Հա´յ զինվոր, քեզ մեր երկիրն են վստահել: Հենց քե´զ… Իսկ ես սիրում եմ իմ երկիրը` իմ Հայաստանը, սիրում եմ այնպես, ինչպես Թումանյանն իր Դսեղը, Չարենցն իր Կարսը, Բակունցն իր Կյորեսը: Սիրում եմ և գիտեմ, որ քեզնով է, որ պահպանվում է այսօր գույնն իմ երկրի, բույրն իմ ծաղկանց, քեզնով է, որ արևը ազատ երկնաքերերից վեր ժպտում է, և իմ երկրի ստվերը սաղարթախիտ է մնում:

Այո´, չեմ չափազանցնում, քեզնով է, հա´յ զինվոր, որ այս օդի, ջրի, գույնի, բույրի, արևի ու ստվերի ժառանգորդ ենք դարձել, ուստի սիրում ու պաշտում ենք քեզ, հա´յ զինվոր, անունդ` Հայկ, Արամ, Տիգրան, Վարդան…

Այսօր քո տոնն է, հայո´ց բանակ, հա´յ զինվոր` իմ եղբայր, իմ զարմիկ, իմ հայրենակից: Վստահում եմ քեզ ու գիտեմ, որ չի մթնի աշխարհը, և երկնակամարը հավերժ կապույտ կլինի քանի դեռ ունենք քեզնով մարտունակ հայոց բանակ:

Հայոց բանակի կազմավորման 23-ամյակի առթիվ դպրոցի V-XI դասարաններում կազմակերպվեցին տարաբնույթ միջոցառումներ:

V «ա» դասարանում կազմավորված Գ. Նժդեհի անվան զորաջոկատը բաժանվել էր 5 վաշտերի, որոնք ներկայացրին իրենց նշանաբանները և տեղեկություններ Հայոց բանակի անցած ուղու և Լոռվա մարզում կազմավորված, արցախյան պատերազմին մասնակցած ջոկատների մասին, V «բ» դասարանի աշակերտները նամակ գրեցին դպրոցի շրջանավարտ զինվորներն:

V «ա», VII «ա», VII «բ» դասարանների աշակերտները ներկայացրին հայրենասիրական երգեր ու պարեր, VIII «ա» դասարանի դասղեկի ժամին ներկա էին ազատամարտիկներ Տիգրան Բոյնարջյանը և Պետրոս Անթարյանը, VIII «բ», X «ա», XI «ա», «բ» դասարանների դասղեկի ժամերի ընթացքում կազմակերպվեցին արցախյան պատերազմի հերոսներին նվիրված տեսաֆիլմերի դիտումներ և քննարկում:

VI «բ» դասարանի դասղեկ Տ. Աղաջանյանը կազմակերպեց հրաշալի միջոցառում, որի ընթացքում ներկաները հարգեցին արցախյան պատերազմում զոհված հերոսների հիշատակը: Դպրոցի առանձին դասարանների աշակերտներ շնորհավորական նամակներ ուղարկեցին բանակում գտնվող դպրոցի շրջանավարտներին:

Հայոց բանակի տոնին նվիրված միջոցառումների շարքը եզրափակվեց հունվարի 28-ին դպրոցում հրավիրված տողանով, որի ժամանակ զինղեկ Գ. Սուքիասյանի կողմից անցկացվեց «Երբ ուժեղ ես ու անհաղթ, հայրենիքդ է հպարտ» խորագրով զինվորական պատրաստվածության ստուգատես:

Բազկիդ զորություն, հա´յ զինվոր

Similar news...