Ներկայացվել են Հայաստանի լավագույն բուհերը

Educational 2014-12-26

Կայացել է ՀՀ բուհերի ազգային վարկանիշավորման համակարգի 2014 թվականի արդյունքների ամփոփումը: Միջոցառմանը մասնակցել են ՀՀ կրթության և գիտության նախարար Արմեն Աշոտյանը, բուհերի ռեկտորներ, կրթության ոլորտի ներկայացուցիչներ: Նախարար Արմեն Աշոտյանը, ներկայացնելով վարկանիշավորման համակարգի հիմնական սկզբունքները, հիշեցրել է, որ նախորդ տարի նախարարությունը նախաձեռնել էր փորձնական ծրագիր` մշակել ՀՀ բուհերի ազգային վարկանիշավորման համակարգի մեթոդաբանությունը, թե ինչպիսի որակ են ապահովում ՀՀ բուհերը` ելնելով միջազգային չափանիշերից, որոնք ընկած են ազգային վարկանիշավորման համակարգի հիմքում:

«Այս տարի բազմաթիվ միջազգային և տեղական փորձագետներ են աշխատել, որ այս համակարգը լինի մաքսիմալ օբյեկտիվ և արտահայտի ուսանողակենտրոն որակյալ կրթական ծառայությունների տրամադրման քաղաքականությունը: Այսուհետ վերոնշյալ համակարգը կհանդիսանա այն հիմքը, որով հասարակությանն ամեն տարի կտրամադրվի ՀՀ բուհերի գործունեության օբյեկտիվ պատկերը:

Համակարգի շնորհիվ բուհերը ևս կարող են ուսումնասիրել իրենց թույլ և ուժեղ կողմերը, գործադրել հավելյալ ջանքեր և ճշգրտել` ինչպիսի մրցակցային առավելություններ և թերություններ ունեն»,-նշել է նախարարը` ընդգծելով, որ որոշ բուհեր չեն զբաղեցրել համապատասխան բարձր տեղեր, քանի որ ոչ լիարժեք են ներկայացրել իրենց տվյալները:

«Կա նաև մեկ այլ ծայրահեղություն. որոշ բուհեր նախատեսվածից առավել տվյալներ են ներկայացրել, որոնց արժանահավատության հետ կապված խնդիրներ են ծագել: Ուստի դրանք լրամշակվել են օբյեկտիվ պատկեր ստանալու համար»,-նշել է Արմեն Աշոտյանը:

Ամփոփելով վարկանիշավորման արդյունքները` նախարարն ընդգծել է, որ առաջատար եռյակում են հայտվել Երևանի պետական համալսարանը, Հայաստանի ամերիկյան համալսարանը և Երևանի Մ. Հերացու անցան պետական բժշկական համալսարանը:

Ա. Աշոտյանը նաև տեղեկացրել է, որ նախարարությունը նախատեսում է վարկանիշավորման համակարգի արդյունքների հիման վրա վերանայել պետական քաղաքականությունը մի շարք ոլորտներում: Ըստ նախարարի` դա առաջին հերթին կվերաբերի պետական պատվերի ձևավորման սկզբունքներին, որի հիմքում ընկած կլինի նաև վերոնշյալ համակարգում բուհի զբաղեցրած տեղը:

«Իհարկե, սա չի լինի միակ գործոնը. մեզ համար առաջնահերթ կլինի բուհի հավատարմագրված լինելու փաստը, իսկ այս երկու գործընթացները որոշ տվյալներով համադրվում են, որոշ տվյալներով` փոխլրացվում: Երկրորդ, այն բուհերը, որտեղ կան ակնհայտ խնդիրներ, աջակցության և լրացուցիչ վերահսկողության կարիք կունենան:

Երրորդ` հաջորդ տարի նախարարությունը պատրաստվում է վարկանիշավորման համակարգը փոխանցել կամ համատեղ իրականացնել հասարակության և բուհերի վստահությունը վայելող որևէ ոչ պետական կառույցի հետ, ինչպես բոլոր միջազգային վարկանիշավորման համակարգերի պարագայում է»,-նշել է նախարարը` հավելելով, որ վարկանիշավորման համակարգը շատ օգտակար կարող է լինել նաև ապագա դիմորդների համար:

Վարկանիշավորման համակարգի մեթոդաբանությունը և իրականացված փոփոխությունները ներկայացրել է ԿՏԱԿ-ի տնօրեն Արտակ Պողոսյանը, ով նաև պատասխանել է բուհերի ներկայացուցիչներին հետաքրքրող հարցերին:

Աղբյուրը՝ edu.am

Ներկայացվել են Հայաստանի լավագույն բուհերը

Similar news...