ԵՊՀ-ի հյուրը Պիեռ Ժոլիո-Կյուրին էր

Պրոֆեսորը, ով իր գիտական գործունեությունը հիմնականում ծավալել է կենսաբանության, ֆիզիկայի և քիմիայի գիտահետազոտական ինստիտուտում (IPPC), ներկայացրեց սեփական մեթոդներն աշակերտներին և ուսանողներին գիտության մեջ ներքաշելու գործում:

 

«Երիտասարդների՝ գիտության մեջ ներգրավվածության աստիճանը աշխարհի բոլոր երկրներում և պատմության գրեթե բոլոր փուլերում անհանգստացրել է ավագ սերնդին: Այսօր էլ գրեթե նույն պատկերն է: Դեռ աշակերտական նստարանից հատուկ մշակված մեթոդներով ու խաղային տարբերակներով պետք է դպրոցականների շրջանում սերմանել գիտության հանդեպ հետաքրքրություն ու սեր»,- նշել է գիտնականը:

 

Պիեռ Ժոլիո-Կյուրին խոսել է նաև գիտական ոլորտի ներկայիս խնդիրների մասին՝ մասնավորապես նշելով, որ մրցակցությունը և չափից շատ տեղեկատվական հոսքերի հասանելիությունը ստեղծարարական տեսանկյունից չեն նպաստում գիտության զարգացմանը:

 

Հյուրն անդրադարձել է նաև հիմնարար գիտության պահպանման անհրաժեշտության, ինչպես նաև գիտության մեջ կնոջ և տղամարդու հավասարության խնդիրներին՝ ընդգծելով, որ գիտական և ընդհանրապես բոլոր հարցերում կնոջ և տղամարդու դիրքորոշումներն ու աշխարհայացքները տարբեր են, և հենց այդ տարբերության շնորհիվ է, որ համատեղ աշխատանքն ամբողջական արդյունք է տալիս:

 

Դասախոսությունից հետո համալսարանականները մի շարք հարցեր են ուղղել հյուրին, իսկ հանդիպման վերջում Մենուա Սողոմոնյանը Պիեռ Ժոլիո-Կյուրիին հանձնել է ԵՊՀ-ի մասին պատմող բուկլետներ, ինչպես նաև մեծանուն նկարիչ Շմավոն Շմավոնյանի «Արարատ» ալբոմը: Հավելենք, որ Պիեռ Ժոլիո-Կյուրին քիմիայի ոլորտի՝ 1935թ.-ի Նոբելյան մրցանակակիրներ Պիեռ և Մարի Կյուրիների թոռն ու Ֆրեդերիկ և Իռեն Ժոլիո-Կյուրիների որդին է:

 

Աղբյուրը՝ ysu.am