«Բաց դռների օր» UWC համակարգում սովորել ցանկացողների համար

«Բաց դռների օրը» կկայանա Հայաստանի Ամերիկյան համալսարանի «Փարամազ Ավետիսյան» մասնաշենքի «Մանուկյան» դահլիճում: UWC համակարգում կարող են սովորել 15-17 տարեկան տղաներ և աղջիկներ: 2015 թվականին UWC քոլեջները հայաստանցի ուսանողների համար առաջարկում են 23 տեղ, այդ թվում՝ 10 տեղ UWC Դիլիջան քոլեջում: 

 

UWC Դիլիջան քոլեջից բացի, հայաստանցի երեխաները հնարավորություն ունեն սովորելու UWC-ի համակարգի՝ Իտալիայում, Ուելսում, Հոնկ Կոնգում, Հոլանդիայում, Նորվեգիայում, Գերմանիայում, ԱՄՆ-ում, Սինգապուրում, Հնդկաստանում գործող քոլեջներում:

 

«Բաց դռների օրվան» մասնակցել ցանկացողները կարող են նախապես գրանցվել այս հղումով: Միջոցառումը կվարեն UWC Հայաստանի ազգային կոմիտեի ներկայացուցիչ Դարյա Բրոդնիկովսկայան և UWC Դիլիջան քոլեջի տնօրեն Ջոն Փադըֆութը: 

 

Նրանք կպատասխանեն UWC դպրոցներին, այդ թվում` UWC Դիլիջան քոլեջին վերաբերող հարցերին, կներկայացնեն ընդունելության կարգը։ Միջոցառման ընթացքում կարող եք զրուցել նաև UWC Դիլիջան քոլեջի աշակերտների հետ:

 

UWC Դիլիջան քոլեջն իր դռները բացել է ս.թ. սեպտեմբերին` ընդունելով մոտ 50 երկրից ժամանած 96 աշակերտի: Դպրոցի աշակերտների 90 տոկոսը սովորում է բարերարների հատկացրած կրթաթոշակներով:

 

Ընդունելության գործընթացի վերաբերյալ մանրամասն տեղեկատվությունը հասանելի է UWC Հայաստանի ազգային կոմիտեի կայքում:

Լրացուցիչ տեղեկությունների համար կարող եք զանգահարել (+374) 60 699.699 հեռախոսահամարով:

 

UWC-ին (United World Colleges)՝«Միացյալ Աշխարհի Քոլեջներ»-ը, հիմնադրվել է 1962 թվականին: Կրթական մեծ փորձի վրա հիմնված UWC ծրագրերի նպատակն է ողջ աշխարհից ուսանողների կրթությունը կազմակերպել՝ ոգեշնչելով նրանց ստեղծելու նոր ապագա:  Ներկայումս UWC համակարգում գործում են աշխարհի տարբեր երկրներում տեղակայված 14 դպրոցներ և քոլեջներ: Յուրաքանչյուր տարի UWC ծրագրերով ուսանում է շուրջ 7500 աշակերտ: Ուսանողները սովորում են Միջազգային Բակալավրիատ (IB) ծրագրով (մինչհամալսարանական նախապատրաստում):