Կբացվի հոբելյանական ցուցահանդես

Ցուցահանդեսի կապակցությամբ հայերենով ու անգլերենով հրատարակվել է Էդուարդ Իսաբեկյանի ստեղծագործությունների պատկերագիրքը: Էդուարդ Հմայակի Իսաբեկյանը մեր ժամանակների վաստակաշատ արվեստագետներից է, ում բազմաժանր ստեղծագործական ժառանգությունն իր ուրույն տեղն ունի արդի հայ կերպարվեստում:

 

Հայաստանի ժողովրդական նկարիչ (1963թ.), Պետական մրցանակի դափնեկիր (1985թ.), պատվավոր այլ պարգևների ու տիտղոսների արժանացած արվեստագետի ստեղծագործական հետաքրքրությունները լայն ընդգրկում ունեն: Նա ստեղծել է թեմատիկ կոմպոզիցիոն գործեր, բնանկարներ, դիմանկարներ, կատարել է գրքերի նկարազարդումներ:

Նկարչի նախասիրած ժանրերից է դիմանկարը, որով զբաղվել է ողջ կյանքում:

 

Է. Իսաբեկյանը կարևոր ներդրում ունի հայ արվեստում պատմանկարչության զարգացման գործում: Այս ժանրի նշանավոր կտավներից են «Հաղպատի գյուղացիների ապստամբությունը» (1955թ.), «Դավիթ բեկ», «Արտավազդ և Կլեոպատրա» (1966թ.), «Ավարայրի ճակատամարտը» (1983թ.) և «Պատասխան Հազկերտին»  (1947թ.), որոնք ուշագրավ են պատմական դարաշրջանի խոր զգացողության, հետաքրքիր կոմպոզիցիոն կառուցվածքի և արդիական հնչեղության տեսանկյունից:

 

Այս շարքի մեջ առանձնանում է հայ պատմանկարչության լավագույն ստեղծագործություններից մեկը` «Պատասխան Հազկերտին» մեծակտավ աշխատանքը, որում ընդհանրացվում են նկարչի՝ տարբեր ժամանակներում արծարծած գաղափարական ու գեղարվեստական խնդիրները:

 

Աղբյուրը՝ mincult.am