Էկո-հյուրանոցներ

Էկոլոգիապես ամենամաքուր առաջատար հյուրանոցների թվում է Fouquet Barriere 5-աստղանի հյուրանոցը Փարիզում: Հյուրանոցում ճաշատեսակների ընտրանին կազմված է բացառապես օրգանական արտադրանքից: Հյուրանոցում ապահովված է հարուստ բուսական աշխարհ, և մշտապես ներկայացված են «Մաքուր մոլորակ» ցուցահանդեսի նմուշները: 

 

Բնապահպանական հյուրանոցների թվին է դասվում նաև Hacienda & Ecolodge Morgan's Rock բունգալոների համալիրը Նիկարագուայում: Անտառի փեշին գտնվող այս համալիրում հյուրերին տեղավորում են ծղոտածածկ բունգալոներում անմիջապես օվկիանոսի ափին, պարբերաբար ուղեկցում են դեպի անթափանց ջունգլիներ և ծանոթացնում տեղանքին: Բունգալոները նաև ունեն անհատական լողափ: Ընդհանրապես ամբողջ համալիրը կառուցված է բնապահպանական նորմերին համապատասխան, հյուրանոցում մատուցվում են բնական հումքով պատրաստված ուտեստներ, համալիրի սեփականատերերը տարածքում տնկել են շուրջ 100.000 մրգային ծառատեսակներ, բույսեր: Համալիրի կառուցման համար որպես հումք են ծառայել հատուկ մշակված փայտատեսակներ: 

 

Առաջատար էկո-հյուրանոցների թվում է նաև Clayoquot Wilderness Resort համալիրը, որը գտնվում է Կանադայում: Հյուրանոցն անդամակցում է Բրիտանական Կոլումբիայի զբոսաշրջության` բնապահպանության գծով հանձնաժողովին և փորձում է հնարավորինս քիչ ազդեցություն ունենալ շրջակա միջավայրի աղտոտման վրա` քարոզելով բնապահպանական տարբեր ծրագրեր: Հյուրանոցին կից գործում է հյուրանոցային թափոնների մշակման կետ: Գտնվելով անտառախիտ վայրում` հյուրանոցն իր հյուրերին առաջարկում է ծանոթանալ շրջակա տեղանքին զբոսանքի համար նախատեսված հատուկ վայրերով` փորձելով նման կերպ զերծ պահել աղտոտումից շրջակա միջավայրը: 

 

Կոլորադոյի Sonnenalp հյուրանոցի բնապահպանական քարոզումները նույնպես հայտնի են շատերին: Ընտանեկան բիզնեսի զարգացման արդյունքում ստեղծված այս հյուրանոցը պահպանում է աղբամշակման, ջրախնայողական համակարգի խիստ կանոնակարգ: Հյուրերին դիմավորում են էլեկտրաէներգիայի հիման վրա աշխատող փոխադրամիջոցներով, հյուրանոցում պահպանվում է ջրի խնայողական բարձր համակարգ: Ի դեպ, հյուրանոցի աշխատակազմը պարտադիր կարգով անցնում է բնապահպանական դասընթաց` նախքան աշխատանքի անցնելը: 

 

Մեկ այլ էկոլոգիապես բարենպաստ հյուրանոց Bardessono Yountville-ը գտնվում է Կալիֆորնիայում: Չնայած հյուրանոցի շքեղ արտաքին և ներքին հարդարման տեսքի` այն համարվում է լավագույն էկո-հյուրանոցներից մեկը: Հյուրանոցն ունի ստորգետնյա գեոթերմինալ տաքացման համակարգ, սենյակների սավանները պատրաստված են օրգանական հումքից, տանիքն ամբողջովին ծածկված է արևային մարտկոցներով, հյուրանոցում մատուցվում է օրգանական սնունդ, հյուրանոցի կաշվենման նմուշները պատրաստված են էկոլոգիապես մաքուր, արհեստականորեն մշակված հումքերից: Bardessono-ն արժանացել է բարձր գնահատականների մի շարք միջազգային բնապահպանական կազմակերպությունների կողմից: