«Տո՜ն է, տո՜ն է, տառատո՜ն …»

Educational 2014-10-17

Օրերս Երևանի Վ. Համբարձումյանի անվան թիվ 12 հիմնական դպրոցի բակում իսկական տոնահանդես էր: I դասարանցիները տոնում էին մուտքը տառերի աշխարհ: Կազմակերպվել էր «Ա» տառին նվիրված տոնական միջոցառում: Դասասենյակներում անցկացված տոնական դասը շարունակվեց նաև դպրոցի բակում:

Երեք դասարանների դասվարները՝ Ն. Պողոսյանը, Հ. Մինասյանը և Ա. Հովակիմյանը, անակնկալ էին պատրաստել երեխաների, ծնողների և ուսուցիչների համար՝ տառուսուցում դպրոցի բակում «Բումբումիկ շոուի» հերոսների մասնակցությամբ:

Տոնական դասն ընթացավ ներկայիս պահանջներին համապատասխան՝ «խաղ-ուսուցում» սկզբունքով:

Երեխաները կարդացին, գուշակեցին հանելուկներ, խաղացին, պարեցին, նկարեցին: Տոնի ավարտին բակը դարձել էր յուրօրինակ ցուցասրահ՝ և՛ արև, և՛ անձրև, և՛ արևածաղիկ, ամպ ու աքաղաղ, արագիլ ու արտ, Արարատ սար ու ավտոմեքենա:

Երեխաների կավճանկարներն ամփոփեցին դասը: Այն հետաքրքիր և հաճելի էր թե՛ ծնողների, թե՛ ուսուցիչների, թե՛ աշակերտների համար:

«Տո՜ն է, տո՜ն է, տառատո՜ն …»

Similar news...