Երևանի թիվ 155 դպրոցը մասնակցել է Չարենցին նվիրված միջոցառմանը

Միջոցառմանը  ներկա  էին  Երևանի  քաղաքապետարանի  հանրակրթության  վարչության  դպրոցական  բաժնի  պետ  Ա. Մելքոնյանը, հանրակրթության վարչության  մասնագետ Ն. Հարությունյանը, Աջափնյակ  վարչական շրջանի  կրթության և մշակույթի  բաժնի  պետ Գ. Խարբուրդյանը, Չարենցի  տուն – թանգարանի  տնօրեն  Լ. Հակոբյանը, ՀՀ  վաստակավոր  արտիստ Ա. Գասպարյանը, բանաստեղծ  Կ. Առաքելյանը, պատվավոր այլ  հյուրեր: 

 

Միջոցառման   ընթացքում  աշակերտները  ներկայացրին  ոչ  միայն  Չարենց բանաստեղծին , այլ  նաև  Չարենց  մարդուն՝  իր  հախուռն  խառնվածքով,  վեհ գաղափարներով  ու  ազնիվ  նկրտումներով: Հնչեցին  Չարենցի  լավագույն  ստեղծագործությունները, նրա  խոսքերով  գրված  երգեր, բեմադրվեցին  հատվածներ  մեծ  պոետի  կյանքից:

 

Միջոցառման  ավարտին   դպրոցի  տնօրեն Լ. Դանիելյանը, գնահատելով  միջոցառման  դերն  ու  նշանակությունը,  նշեց,  որ  նմանատիպ   միջոցառումները  մեր   մեծերի  գրական  հարուստ  ժառանգությունը  նոր  սերնդին  հասցնելու  լավագույն  ճանապարհներից     մեկն  է: Մեր  ժողովրդի  հոգևոր արժեքների  պահպանումը, աշակերտների  գեղագիտական  դաստիարակությունը  դպրոցում  ամուր  հիմքերի  վրա  են  դրված: 

 

Միջոցառման  մասին  իրենց  կարծիքը  հայտնեցին  նաև   Ա. Մելքոնյանը, Լ. Հակոբյանը, Ա. Գասպարյանը: Նրանք  հավաստիացրին, որ  քանի  դեռ  դպրոցական  բեմերից   հնչում  են   Չարենցի  մարգարեական  խոսքերը, նա  կշարունակի  քայլել  ժամանակի  հետ  իբրև   կենդանի  բանաստեղծ: