Կայացել է հերթական խորհրդակցությունը

Պետական բուհերի համար ընդհանրական խնդիրներն առնչվել են հիմնականում բուհերի գործունեության ոլորտում հավասար մրցակցային պայմանների ապահովմանը, ոլորտում պետական միասնական քաղաքականության մշակմանը, բուհերի կազմակերպաիրավական կարգավիճակի բարեփոխմանը, բնագիտական և ինժեներական կրթության զարգացման մասին համալիր պետական ծրագրի մշակմանը և մի շարք այլ հարցերի:

 

Ռեկտորների խորհրդի նախագահ, ԵՊՀ ռեկտոր Արամ Սիմոնյանը և խորհրդի անդամ մյուս ռեկտորները նախարարի զեկույցից հետո ներկայացրել են յուրաքանչյուրն իր ղեկավարած ուսումնական հաստատության առաջնահերթ խնդիրները, վերջին շրջանի ձեռքբերումներն ու զարգացման ծրագրերը:

 

Հանդիպման մասնակիցները շնորհակալություն են հայտնել Հանրապետության Նախագահին՝ ոլորտի խնդիրները հետևողականորեն ուշադրության կենտրոնում պահելու, պարբերաբար նման խորհրդակցություններ հրավիրելու և դրանց ընթացքում առկա խնդիրներին լուծումներ տալու համար:

 

Խորհրդակցության ավարտին Նախագահ Սերժ Սարգսյանը հանձնարարել է ՀՀ ԿԳ նախարարին և ՀՀ Նախագահի աշխատակազմի ղեկավարին ամփոփել բարձրացված խնդիրներն ու դրանց լուծման ուղղված առաջարկությունները, քննարկել համապատասխան գերատեսչությունների հետ և զեկուցել արդյունքների մասին:

 

Նախագահը վստահեցրել է, որ բարձրացված բոլոր խնդիրները և դրանց հնարավոր լուծումները հանգամանորեն կքննարկվեն, ռեկտորների խորհուրդը ևս կտեղեկացվի արդյունքների մասին:

 

Աղբյուրը՝ edu.am