Միջոցառում` նվիրված Սուրբ Թարգմանչաց տոնին

Հայ ժողովուրդն իմացության ու ճանաչողության մշտակա ծարավով  ու ձգտումով, առանձնակի սիրով է մեծարել հայոց գրերը ստեղծող և թարգմանչական գործի նվիրյալ զավակների` սուրբ Սահակ Հայրապետի և սուրբ Մեսրոպ Մաշտոցի, Եղիշեի, Մովսես Քերթողի, Դավիթ Անհաղթի, Գրիգոր Նարեկացու, Ներսես Կլայեցու ճշմարիտ հավատքի և առաքինի վարքի ապրումն ու գիտակցությունը:

 

Միջոցառման նպատակն էր արժևորել հայոց գրերի գյուտի և թարգմանիչ վարդապետների դերն ու նշանակությունը հայ ժողովրդի կրթամշակութային կյանքում և ազգապահպան գործում:

 

Միջոցառումն սկսվեց  «Տերունական աղոթքով»: Այդ օրը Ակնալճի միջնակարգ դպրոց հյուր էին եկել Մայր Աթոռ Սուրբ Էջմիածնի քրիստոնեական դաստիարակության կենտրոնի պատասխանատու Գյուլնազ Գրիգորյանը և Դավիթ  սարկավագը: Հյուրերն իրենց հետ դպրոց էին բերել Մայր Աթոռի օրհնությունը և աղոթագրքեր:

 

Միջոցառման ընթացքում աշակերտները սահուն կերպով ներկայացրեցին օրվա խորհուրդը, արտասանեցին բանաստեղծություններ, երգեցին շարականներ, հանդես եկան երկու պարային կատարմամբ:

 

Առաջինը նվիրված էր հայոց գրերի տեսիլքածին գյուտին, իսկ երկրորդը` հայ ժողովրդի գոյությանն ու հարատևմանը:

Միջոցառումը մերթընդմերթ համեմվում էր նշանավոր մարդկանց՝ հայոց լեզվի և հայ ժողովրդի ինքնությանն առնչվող խոսքերով:

 

Միջոցառումն ավարտվեց ջերմ ու տպավորիչ մթնոլորտում: Իր գովեստի խոսքն ասաց դպրոցի տնօրեն տիկին Ս. Թադևոսյանը, իսկ Գյուլնազ Գրիգորյանը և Դավիթ սարկավագը ուսուցչուհուն մաղթեցին բեղմնավոր աշխատանք, աշակերտներին` ուսման մեջ նորանոր հաջողություններ: