Կմեկնարկի «Կինոաշուն» ծրագիրը

Հինգերորդ «Կինոաշունը», որը նվիրվում է Սերգեյ Փարաջանովի 90-ամյակին, կմեկնարկի Լոռու մարզից՝ Վանաձոր քաղաքից: 

 

«Ազգային կինոտոնն ինչպես նախորդ տարիներին, այնպես էլ այս տարի միաժամանակ կմեկնարկի մարզերում և Երևանի համայնքներում բազմազան կինոծրագրերով…»,- նկատել է Հայաստանի ազգային կինոկենտրոնի տնօրեն Գևորգ Գևորգյանը:

 

Անդրադառնալով «Կինոաշնան» շրջանակներում կազմակերպվող մրցույթներին, նշվել է, որ կհայտարարվի «Հին և նոր երևանցի» թեմայով 7-10 րոպե տևողությամբ ֆիլմերի մրցույթը, որն անցկացվում է Երևանի քաղաքապետարանի հետ համատեղ, ինչպես նաև «Լավագույն գրախոսական» ավանդական մրցույթը, որի համար հատուկ ընտրվել են վերջին երկու տարիներին նկարահանված ֆիլմերը:

 

Ավանդույթի համաձայն` կնշվեն մեր անվանի կինոգործիչների՝ Առնոլդ Աղաբաբովի (85), Բագրատ Հովհաննիսյանի (85), Գենադի Մելքոնյանի (70), Արման Մանարյանի (85) հոբելյանները: 

 

Նախատեսվում են նրանց ստեղծագործությունների հետահայաց ցուցադրություններ, ուսանողների մասնակցությամբ «Մեր մեծերը» խորագրով կլոր սեղան-քննարկումներ:

 

Հեղինակ` Սիրանուշ Հայրապետյան 

Աղբյուրը`www.aravot.am