Ներկայացվել է երրորդ մոնիթորինգի զեկույցը

Ողջունելով միջոցառման մասնակիցներին` ՀՀ կրթության և գիտության նախարար Արմեն Աշոտյանը նշել է, որ հասարակական դիտորդների խումբը  ստեղծվել է տարիներ առաջ նախարարի նախաձեռնությամբ, որում ներգրավվել են երեխաների իրավունքների պաշտպանությամբ զբաղվող հասարակական կազմակերպություններ:

 

«Խումբն անկախ կառույց  է, որն այս տարիների ընթացքում բավականին արդյունավետ աշխատել է, մեզ օգնել է հատուկ կրթական հաստատություններում երեխաների իրավունքների պաշտպանության հետ կապված իրավիճակը ճիշտ գնահատելու: Ընդ որում` խնդրո առարկա է  եղել ոչ միայն երեխայի կրթության իրավունքի, այլ նաև վերջինիս զուգորդված այլ իրավունքների պաշտպանությունը…»,- նշել է ՀՀ ԿԳ նախարարը:

 

Զեկույցը, որին աջակցել է Գերմանիայի Դաշնության Հանրապետությունը, ՄԱԿ-ի մանկական հիմնադրամը (ՅՈՒՆԻՍԵՖ), Բաց Հասարակության Հիմնադրամներ-Հայաստանը և իրականացվել է Ֆրանս-Հայկական Զարգացման Հիմնադրամի կողմից, պատրաստվել է հանրային դիտորդական խմբի կողմից 2013թ. մայիս հոկտեմբեր ամիսներին 22 հատուկ կրթական հաստատություններում հանրային դիտորդական խմբի կողմից իրականացված մոնիթորինգի արդյունքում: 

 

Ծրագրի նպատակն է խթանել և պաշտպանել երեխաների իրավունքները հատուկ կրթական հաստատություններում՝ ներդնելով երեխաների իրավունքների անկախ մոնիտորինգի մեխանիզմ:

 

2013թ. մոնիտորինգի ենթարկված 22 հատուկ կրթական հաստատություններում խնամք է մատուցվում 2,106 երեխաների, որոնցից` 1230 երեխա՝ ՀՀ կրթության և գիտության նախարարության և 876 երեխա` Տարածքային կառավարման նախարարության ենթակայության հաստատություններում: 

 

Աղբյուրը` edu.am