Կույրերի համար թրթռուն հագուստ է ստեղծվել

"Eyeronman" անունը ստացած սարքը կարող է ոչ միայն կույրերի, այլ նաև` հրշեջների, զինվորների և այլ մասնագետների համար օգտակար լինել:

 

Պատերազմի ընթացքում հաշմանդամ դարձած մարդիկ, վերջույթների կորստի դեպքում, կառավարությունից թանկարժեք պրոթեզներ են ստանում, մինչ կուրացած վետերանները ստիպված են միայն ձեռնափայտով բավարարվել, հիշեցրել է ընկերության հիմնադիր և գլխավոր բժշկական խորհրդատու, Նյու-Յորքի համալսարանի բժիշկ, դոկտոր Ջեյ Ռիցցոն: 15 տարեկանում նրա մոտ խորիոդերեմիա է ախտորոշվել: Դա հազվադեպ պատահող` ցանցաթաղանթի դեգեներատիվ հիվանդություն է, որի արդյունքում տեսողության աննահանջ կորուստ է գրանցվում. հիմա Ռիցցոն գրեթե ոչինչ չի տեսնում: Բժիշկը համոզված է, որ կույր մարդիկ պետք է առավել զարգացած սենսորային պրոթեզներ կրելու հնարավորություն ունենան:

 

"Eyeronman"-ը բազմաթիվ սարքերով «հարստացված» շապիկ է` տվիչներ, ինքնագնաց ավտոմեքենաների համար կիրառվող լազերի հիմքով ստեղծված համակարգի` «լիդարի» ճառագայթիչներ, էխոլոկացիայի նպատակով չղջիկների և այլ կենդանիների կողմից կիրառվող ուլտրաձային թողարկիչներ և որսի հայտնաբերման համար բոժոժավոր օձերի կողմից կիրառվող էլեկտրամագնիսային ճառագայթման տեսակներից մեկը թողարկող համակարգեր:

 

Համակարգը հիշյալ տվիչներից ստացված ազդանշանը էլեկտրականապես ակտիվ պոլիմերներից պատրաստված հագուստի վիբրացիա է առաջացնում: Օրինակ` եթե խոչընդոտը օգտատիրոջ շապիկից ձախ` ներքևի մասում է գտնվում, ապա կույր մարդը հենց այդ կողմում էլ վիբրացիա կզգա:

 

"Eyeronman" պատենտավորված համակարգը կարող են նաև զինվորները կիրառել` մարտական գործողությունների ժամանակ, կամ էլ` ոստիկաններն ու հրշեջները` սահմանափակ տեսադաշտի պարագայում (գիշեր, հրդեհի ու պայթյունի ծուխ):

 

Նմանատիպ սարքեր մինչ այժմ էլ մշակվել են, սակայն սա առաջին դեպքն է, երբ պլատֆորմն ի վիճակի է հայտնաբերված օբյեկտների մասին տեղեկատվությունը մարմնին հաղորդել:

 

Աղբյուրը՝ med.news.am