Այբբենարանի հանդես Ակնալճի միջնակարգ դպրոցում

Քանակական առումով հագեցած դասարանում բազմավաստակ և հմուտ ուսուցչուհին իր ուսերին դրված պարտականությունը բարեխղճորեն էր կատարել` աշակերտները դարձել էին գրաճանաչ: Միջոցառման ժամանակ աշակերտները գեղեցիկ արտասանեցին, յուրաքանչյուրը դարձել էր այբուբենի տառերից մեկը, և խոսքի միջոցով ավելի պերճաշուք դարձրեցին մեր ոսկետառ այբուբենը, կախարդական բանալիով բացեցին Մեսրոպյան գանձարանը և հանդիսատեսին մատուցեցին ոսկեղենիկ մայրենիի թովչանքը:

 

Արտասանությունները զուգորդվեցին երգերով, որի ժամանակ աշակերտները նազանքով շարժումներ էին կատարում:

Ուսուցչուհին հանդեսի կազմակերպման հիմքում դրել էր հայրենասիրության գաղափարը: Աշակերտները լցված էին հայրենասիրական ոգով: Աշակերտներից մեկը, ով զինորական հագուստով էր, մարմնավորում էր հայ զինորի կերպարը` որպես ապագա հայրենիքի պաշտպան:

 

Միջոցառումն անցավ ուրախ ու հաճելի մթնոլորտում` ծնողները գոհ էին, աշակերտները` երջանիկ: Միջոցառման ավարտին դասվար Մ. Հովսեփյանը իր ջերմ խոսքն ասաց երեխաներին և նրանց ծնողներին: Երեխաներին մաղթեց խաղաղ ու անհոգ մանկություն, իսկ ծնողներին` սեր ու հոգատարություն:

 

Դպրոցի տնօրինությունը իր երախտիքի խոսքն ասաց դասվարին և մաղթեց նրան բեղմնավոր աշխատանք: