«Սիրո կամուրջներ» խորագրով միջոցառում Խ. Աբովյանի անվան թիվ 1 դպրոցում

Դպրոցի երիտասարդ ուսուցիչներ Ա. Հարությունյանը և Թ. Մելքոնյանը նախապատրաստեցին նրանց մի միջոցառում,որը «Սիրո կամուրջներ» անունն էր կրում: Այն սիրո պոեզիայի լավագույն նմուշների բեմականացման հրաշալի փորձ էր: «Մի՛ պատմիր սերը, սերը կտուժի: Խոսքերը սուղ են, սեղմ, իսկ ինքը՝ մեծ, պարզապես պահպանի՛ր, փայփայի՛ր այն, երկարացրու՛ նրա հետ լինելու չքնաղ ժամանակը»,- այս էր բնաբանը սիրո տոնի:

 

Բեմական կադրերը հաջորդում էին իրար, ձգվում էին սիրո կամուրջները և պոեզիայի խաչմերուկներում հանդիպում էին մեծերը՝ Լորկան, Պետեֆին, Շեքսպիրը, Բյորնսը և Պերսը, Ալիսա Կիրակոսյանը, Սևակը, Տերյանն ու Չարենց, Ռիլկեն ու Պաստեռնակը և ուրիշներ:

 

Թվում էր՝ բեմը մի կապույտ հորիզոնական փռվածք էր հողը մնացել էր ներքևում, և երկինքը վրանել էր սիրո տունը: Մոռացվել էր մարդկային քայլքը, ու ամեն ինչ սահում էր, թևում: Երջանիկ էին բոլորը, հասկացված, բեմական նյութը՝ բոլորին սրտամոտ, բոլորին հավասարապես ախորժելի: Միջավայրը մտերմության բույր ուներ, և բաց էին հոգու դռները անկեղծության առաջ, մաքրության համար:

 

Թվում էր՝ սերը լայնափեշ մի աղջիկ էր, որը ճկուն պտույտներ էր անում, նազանքով իջնում դահլիճ ու նորից բեմ բարձրանում: Այն ամենուր էր:

 

Միջոցառումը բավականին գեղեցիկ էր ստացվել, իսկ աշակերտները և հյուրերը մեծ բավականություն ստացան: