Միսակ Մեծարենցին նվիրված բաց դաս 8-րդ դասարանում

Դասն սկսվեց Մեծարենցին նվիրված բանաստեղծություններով և խոսքերով: Այնուհետև նախապես ձևավորված հետազոտող խմբերի ավագները ներկայացրին իրենց ուսումնասիրած թեմաները: Առաջին խումբը ներկայացրեց Մեծարենցի կյանքը, երկրորդը՝ «Սիրերգն» ու «Ձմրան պարզ գիշեր», երրորդը՝ «Աքասիաներու շուքին տակ» բանաստեղծությունը, իսկ չորրորդ խումբը ներկայացրեց «Ըլլայի, ըլլայի…» շարքը՝ կենտրոնանալով ծրագրային նյութի՝ «Հյուղը» բանաստեղծության վրա: 

 

Դասարանը կահավորված էր հեղինակի դիմանկարով, ստեղծագործական ժողովածուով, հեղինակի կյանքին և ուսումնասիրված թեմաներին նվիրված պաստառներով, որոնց առանձին շուք ու հմայք էին հաղորդում պաստառների վերևում մեղմորեն օրորվող «լուսե ու տապե գինով» ակացիաների ծաղկած ճյուղերը:

 

Խմբերը նախապես կատարել էին նյութի ինքնուրույն հետազոտում, փաստերի կուտակում, իսկ հետո նաև համադրում: Դասի ընթացքում  աշակերտների կատարմամբ հնչեցին բանաստեղծի լուսաբաղձ երազներով տոգորված «Սիրերգ» և «Կարմիր ծաղիկ մը գարունի» երգերը: